Vətən sevgisi ilə vətənləşən igid

30 il düşmənə əsir düşən əzəli yurd yerimiz Qarabağ naminə başlanan və 44 gün çəkən Vətən müharibəsi şanlı zəfərimizlə başa çatdı. Bu, müqəddəs haqq savaşında Vətən və xalq yolunda canını fəda edən Babək qeyrətli, polad biləkli , el-oba təəssübkeşliyi varlığına hakim kəsilən minlərlə igidlərdən biri də Nail Rəfail oğlu Orucov idi. O, 1978-ci ildə Astaranın Məscid məhəllə kəndində mənəvi təmələ tapınmış, pak niyyətli ailədə boya-başa çatmışdır. Sağlam əqidəli, xalqa, dövlətli sədaqətli oğul kimi bütün həyatını Vətənə bağlayan Nail erməni dığaların doğma Azərbaycanda törətdiyi vəhşiliklərə heç cür dözə bilmir. Vətən torpaqlarını onların murdar tapdağından azad etmək üçün həyatını hərbiyə bağlayır.

Əvvəlcə Hərbi liseydə oxuyur. Burada Nail Vətəninin taleyini düşünməklə hərbinin sirlərinə bacarıqla yiyələnir və dərin zəkası, həyata baxışı onu çoxlarının sevimlisinə çevirir. Liseyi başa vuranda bu, vətənpərvər yeniyetmənin gələcəkdə nəyə qadir olacağı bilinir. Nail qazandığı biliyini daha mükəmməl etməkdən ötrü 1995-ci ildə Bakı Ümumqoşun məktəbinə daxil olur. Kökdən gələn mənəvi zənginlik, nəcib əməllər uğrunda çalışmaq istəyi, Vətən yanğısı, onun xilasına yönələn mütərəqqi idealları, məqamında insanların köməyinə yetmək məharəti yeni təhsil ocağında da ona arzularına doğru stimul verir. Başa düşür ki, hər şeyin kamil ustası olmaqla tutduğu yolda məqsədə çatmaq olar. Belə ki, Vətəninə etibarlı müdafiəçi olmaq üçün məktəbi yüksək səviyyədə “Motoatıcı” ixtisası üzrə bitirib, leytenant rütbəsi qazanır.

Həyatının dəyərini Vətəninə, xalqına ləyaqətli xidmətdə görən Nail Orucov 1999-cu ildə leytenant rütbəsində ixtisası üzrə milli ordu sıralarda xidmətə başlayır. Birinci taqım komandiri vəzifəsi ona həvalə edilir. Nümunəvi xidməti, insana qayğısı ilə əsgərlərin, zabitlərin dərin məhəbbətini qazanır. Ətrafdakılar arasında ruh yüksəkliyi yaradır, Vətənə, torpağa sevgi hissi aşılayır. Sonra bölük komandiri, tabor komandirinin maddi texniki təminat üzrə müavini, qərargah rəisi, maddi texniki təminat bölməsinin (Q4) rəisi və maddi-texniki təminat üzrə rəisi vəzifəsində çalışır. Pillə-pillə ucaldıqca, layiq olduğu rütbələri alır. Polkovnik-leytenant kimi ehtiyata buraxılır. Qaldı ki, qana susayan düşməndən qisas alacağı günü döyüş əməliyyatlarda tam yetişmiş Vətənin sadiq keşikçisi olmaqla ürək yanğısi ilə hər an gözləyir...

Nəhayət polkovnik-leytenantın istədiyi gün gəlir. 29 sentyabr 2020-ci ildə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti tərəfindən təlimlərə cəlb olunur. Oktyabrın 6-dan etibarən, Birinci tabor komandiri vəzifəsində Qarabağ naminə odun-alovun içinə atılır. Onun taboru Füzuli, Hadrut, Cəbrayıl və Qubadlı istiqamətində bir-birindən çətin əks-hücum əməliyyatlarında mərdliklə vuruşur, düşməni ciddi itki verməklə geri çəkilməyə məcbur edir, Qubadlı rayonunun Azərbaycan və Ermənistan sərhədin tam nəzarətə alır. Oktyabrın 31-də düşmən təxribatı nəticəsində Qubadlıya yenidən hücum olunur və düşmənin artilleriya atəşi nəticəsində polkovnik-leytenant Nail Orucov şəhadətə yüksəlir. 42 yaşında Vətən sevgisi ilə vətənləşən Astaranın igid oğlu şanlı zəfərimizin qalib şəhidi kimi milyonların qəlbinə köçür.

Zəfər Orucoğlu

Azad azərbaycan.- 2021.- 11 mart.- S.5