“Şəhidlər zirvəsinin fatehləri”

Masallıda şəhidlərə həsr edilmiş kitabların təqdimatı keçirilib

Dünən - 19 may tarixində Masallı rayon Heydər Əliyev Mərkəzində Gülsüm Adilqızının 2021-ci il tarixdə Bakının “Elm və təhsil” nəşriyyatında nəfis şəkildə, təbaşirli kağızda və qalın qabıqda çapdan çıxmış “Şəhidlər zirvəsinin fatehləri” və “Murad ömrü” kitablarının təqdimat mərasimi olub. Pandemiya qaydaları gözlənilmək şərtilə keçirilən tədbiri Masallı Rayon İcra Hakimiyyəti başçısının müavini Aybəniz Qafarova açıb.

Şəhidlərin ruhu bir dəqiqəlik sükutla yad edilib.

Kitabın müəllifi, tanınmış jurnalist Gülsüm Adilqızı 44 günlük Vətən müharibəsində qəhrəman oğullarımızın şücaətindən, müzəffər Ali Baş Komandan İlham Əliyevin siyasi iradəsindən, şəhidliyin uca məqamından danışıb, kitabların nəfis şəkildə ərsəyə çatmasında ona dəstək verənlərdən söhbət açıb. Kitablarda rayonumuzun Viləş kəndindən olan şəhid qardaşlar – Aprel şəhidi Nurlan Əsgərli və Azərbaycan Silahlı Qüvvələrinin giziri, İkinci Qarabağ müharibəsinin şəhidi, Vətən Müharibəsi Qəhrəmanı İntiqam Əsgərli haqqında geniş yazı verilib. Kitab yazısında qardaşların həyat və döyüş yolu işıqlandırılıb, şəkillərdən geniş istifadə olunub.

Şəhidlərə həsr edilmiş “Şəhidlər zirvəsinin fatehləri” və “Murad ömrü” kitablarının hər biri 2000 tirajla nəşr edilib.

Rayon Ağsaqqallar Şurasının sədri, yazıçı-publisist Ələşrəf Niftiyev, Masallıda məskunlaşmış şuşalı Rafiq Abbasov, «Əlil qadınlar» cəmiyyətinin sədri, “Tərəqqi” medallı Aminə Abıyeva, rayon təhsil şöbəsinin müdir müavini Samit İslamov, «Vətən uğrunda» medallı şəhid Niyaməddin Sultanzadənin anası Mehriban Sultanova və bağqaları çıxış edərək kitabın yüksək amal, Vətən uğrunda şəhid olanların haqqında əsl vətənpərvərlik ruhu ilə yazıldığını qeyd ediblər.

İki şəhidin anası Ziba Əsgərli övladlarının döyüş yolundan, onların vətənpərvərliyindən danışıb, kitabların müəllifinə təşəkkür edib.

Tədbiri yekunlaşdıran Gülsüm Adilqızı kitabların təqdimatı üçün yaxşı şərait yaradıldığına görə rayon rəhbərliyinə minnətdarlıq bildirib.

Qeyd edək ki, Aprel şəhidi Nurlan Əsgərli və Azərbaycan Silahlı Qüvvələrinin giziri, İkinci Qarabağ müharibəsinin şəhidi, Vətən Müharibəsi Qəhrəmanı İntiqam Əsgərli də daxil olmaqla “Şəhidlər zirvəsinin fatehləri” adlı 304 səhifəlik kitabı 2016-cı ilin aprel döyüşlərində Müzəffər Azərbaycan Ordusunun Xüsusi Təyinatlı Qüvvələrində hərbi xidmət edərək qəhrəmancasına şəhid olmuş zabit və gizirlərimizin həyat və döyüş yolundan bəhs edir. Hər iki yeni kitablarda şəhidlərin valideynlərinin, döyüş yoldaşlarının xatirələri toplanılıb.

Ə.ŞÜKÜROV, H.ƏLİYEV

Azad Azərbaycan.- 2021.- 20 may. S. 5.