Tariximizin yeni səhifəsində özünə yer alan ŞƏHİDİM

Müharibənin bitməsinə cəmi bir neçə saat qalmış şəhid olan QƏHRƏMANIMIZ

Azərbaycanda Vətən müharibəsi başlanan gündən Şərur rayonundan da igid oğullar ölkəmizin müdafiəsinə qalxdılar. Onların bir şuarı var idi: “Ancaq irəli getmək, düşməni məhv etmək”. Bu qəhrəman şəhid oğullarımız, torpağını, Vətənini canlarından çox sevənlər idilər.

Şərur rayonundan olan bu şəhid qəhrəmanlar yeni tariximizin səhifəsində özlərinə yer aldılar. Şəhidlərin qanını alimlərin mürəkkəbi yuya bilər. Onlar özlərinin sinəsini qabağa verərək heç nədən qorxmadan, çəkinmədən torpağımızı müdafiə etdilər. Həyatda hər şey unudula bilər, lakin Vətəni, torpağı heç kəs unuda bilməz. Vətən torpağını da cəsur oğullar qoruyar. Belə qəhrəman oğlullardan biri də Novruzlu Pərviz Qorxmaz oğludur. O, 1997-ci ilin oktyabr ayının 15-də Naxçıvan MR-nın Şərur rayonunun Çərçiboğan kəndində anadan olmuşdu.

Pərviz ailənin sonbeşiyi idi, onun iki bacısı, bir qardaşı var. O, 2004-cü ildə Çərçiboğan kənd məktəbinin 1-ci sinfinə qəbul olub, 2015-ci ildə elə həmin məktəbin məzunu olmuşdur. Pərviz 2015-ci ilin oktyabrında Naxçıvan MR-nın N saylı hərbi hissəsində xidmətə çağrılır. Qəhrəmanımız hərbi xidməti dövründə 15-17 avqust 2016-cı il tarixində keçirilmiş “Ən yaxşı kəşfiyyat qrupu” yarışında 1-ci yeri tutduğuna görə Fəxri fərmanla təltif olunur. O, 2017-ci il mart ayının 23-də hərbi xidməti kəşfiyyatçı əsgər kimi başa vurur.

2016-cı il oktyabrın 15-də hərbi xidməti dövründə tərkibində olduğu taborun kollektivi ad günü münasibətilə Novruzlu Pərvizi təbrik edərək yazmışdılar: “Arzu edirik növbəti ad gününü ailənizlə birlikdə işğal olunmuş torpaqlarımızın dilbər guşələrində qeyd edəsiniz”.

Həqiqətən də növbəti il olmasa da 4 il sonra 23 yaşını 2020-ci il oktyabrın 15-də döyüş bölgəsində, daha dəqiq desək, Xocavənddə olarkən döyüş yoldaşları ilə elə döyüşərkən qeyd etdi şəhidimiz. O, hardan biləydi ki, bu doğum günü onun üçün sonuncu olacaq...

Hərbçi olmaq uşaqlıqdan arzusu idi Pərvizin. Bunun üçün əlindən gələni etmişdi. Hətta müxtəlif hərbi kurslara gedirdi, normativlərdən uğurla keçirdi. O, 2020-ci ilin iyulun 20-də MAHHXHQ kimi fəaliyyətə başlamışdı. İki ay sonra 21 gün idi işə başladığı könüllü olaraq Vətən savaşına qatılaraq oktyabrın 11-dən noyabrın 9-na kimi 29 gün qəhrəmancasına savaşdı və müharibənin bitməsinə cəmi bir neçə saat qalmış şəhid oldu Pərviz. Cəmi 112 gün hərbçi ola bildi...

Sonuncu dəfə 8 oktyabrda evə gəlmişdi, səhəri günü gedəndə anasına deyir: “Ana mənə isti paltar, iki günlük yemək qoy, dağa gedəcəyik”. Müharibəyə yollanandan cəmi üç-dörd dəfə ailəsi ilə telefon danışığı olub. Ən son qardaşı ilə oktyabrın 23-də telefonla əlaqə saxlayıb. Hər dəfə də danışanda bu sözləri deyirdi: “Narahat olma qaqa, hər şey yaxşıdı”.

Cəbrayıl, Fizuli, Xocavənd, Laçın və ən son Şuşada döyüşdü Şəhidimiz. Azərbaycanın ərazi bütövlüyü uğrunda, Vətən yolunda canından, qanından keçən şəhidimizdən, qardaşımızdan, oğlumuzdan biri idi naxçıvanlı igidimiz…

Novruzlu Pərviz Qorxmaz oğlu atasının adını mənəviyyatında daşıyan oğul idi. Düşmənlə döyüşdə necə şücaət göstərdiyindən fəxrlə danışırlar döyüş yoldaşları. Ayrı-ayrılıqda ailəsinin ziyarətinə gələn bir neçə döyüş yoldaşı da Pərviz haqqında xatirələrindən danışırlar. Pərviz əsgər yoldaşlarından birinə belə deyibmiş: “Mən hiss edirəm ki, şəhid olacam”.

Pərvizin ürəyinə daman oldu. Şuşa uğrunda gedən döyüşlərdə qəhrəmancasına şəhid olub, o mübarək zirvəyə ucaldı Novruzlu Pərviz Qorxmaz oğlu.

Şəhidimizin ən böyük arzusu yaşadığı evi təmir etdirib ailə həyatı qurmaq idi, amma çox təəssüf ki, bu ona qismət olmadı. Ondan geri qalan, xoş sözləri, zarafatları və təbii ki, gülərüzlü, nur simalı şəkilləridir... Mehriban, əliaçıq, ürəyitəmiz, hər kəsə yardım əlini uzadan bir insan idi Pərviz. Hər bir kəsin sevgisini qazanmağı bacarırdı. Uşaqla uşaq, böyüklə böyük olurdu, hər hərəkətin yerini bilən, tərbiyəli, məsuliyyətli, hörmətçil igid idi. Deyib-gülmək, gəzmək, əylənmək, vaxtını dəyərli keçirtmək tam onluq idi. Uşaqlarla oynamağı da çox sevərdi...

Şəhidlər ölməz, Vətən bölünməz!

Ruhun şad olsun Pərviz!

Hacı Tofiq SEYİDZADƏ

Azad Azərbaycan.- 2021.- 7 yanvar. S. 5.