Yarımçıq arzular, əbədi həyat…

Şəhid əsgər Kənan Şahbazov ürəklərdə əbədi yaşayacaq

Kənan Natiq oğlu Şahbazov 23 iyul 2002-ci ildə Masallı rayonunun Kəlbəhüseynli kəndində doğulmuşdur. 2008-ci ildə Bakı şəhər Suraxanı rayonu Hövsan qəsəbəsi 76 nömrəli məktəbin birinci sinfinə daxil olmuşdur. 2010-cu ildən Kənan valideynlərinin işi ilə əlaqədar Rusiya Federasiyasının Kazan şəhərinə köçmüş, orta təhsilini orada davam etdirmişdir. Sonra yenidən Bakı şəhərinə qayıtmış və Xətai rayonunda 138 nömrəli tam orta məktəbdə təhsil almışdır.

Qaydasız döyüş idman növü ilə məşğul olmuş, uşaqlar arasında ölkə və Rusiya yarşılarında medallara layiq görülmüşdür.

2019-cu ildə Rusiya Federasiyasının Kazan şəhərində yerləşən “Açıq Federal Universitet”in hüquqşünaslıq fakültəsinin əyani şöbəsinə daxil olmuş, həmin fakültədə birinci kursu (əyani) bitirdikdən sonra 2020-ci ildə ikinci kursa (qiyabi) keçirilmişdir.

Kənan Natiq oğlu Şahbazov 2020-ci ilin iyul ayında Bakı şəhərində Azərbaycan Silahlı Qüvvələrinin N saylı hərbi hissəsində müddətli həqiqi hərbi xidmətdə çağırılıb. Üç aya yaxın idi ki, hərbi hissədə xidmətə başlamışdı...

Azərbaycan Ordusunun əsgəri Kənan Natiq oğlu Şahbazov 27 sentyabr 2020-ci ildə Azərbaycan Silahlı Qüvvələri tərəfindən erməni işğalı altında olan Füzuli rayonu istiqamətində ərazilərin azad edilməsi üçün başlanan Vətən müharibəsi zamanı döyüşlərdə iştirak etmiş, həmin döyüşlərin birində düşmən gülləsinə tuş gələrək şəhidlik zirvəsinə ucalıb.

Şəhidin nəşi 2 oktyabr 2020-ci il tarixdə doğulduğu Masallı rayonunun Çaxırlı kənd qəbirstanlığında torpağa tapşırılıb. Subay idi.

Azərbaycan Respublikasının ərazi bütövlüyünün təmin olunması uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Silahlı Qüvvələrinin əsgəri Kənan Natiq oğlu Şahbazov ölümündən sonra “Vətən uğrunda” medalı ilə təltif olunub.

Əlihüseyn ŞÜKÜROV

Azad Azərbaycan.- 2021.- 28 yanvar.- S.5.