"Tarixi və çağdaş ədəbi prosesə dair araşdırmalar"

XXI əsr Azərbaycan ədəbiyyatşünaslığında öz dəst-xəti ilə tanınan filologiya elmlər doktoru, ADPU-nun professoru Təyyar Salamoğlunun yeni çapdan çıxmış "Tarixi və çağdaş ədəbi prosesə dair araşdırmalar" əsəri 3 bölmədən ibarətdir. Birinci bölmədə müasir Azərbaycan ədəbiyyatında xüsusi mövqeyi olan yazıçılarımızdan M.Cəlalın, İ.Şıxlının, İ.Hüseynovun roman yaradıcılığına aid yeni araşdırmalar yer almışdır. Müəllif M.Cəlalın və İ.Şıxlının əsərlərinin elmi təhlilini verir, onların milli və bəşəri məzmununun vəhdəti, estetik mükəmməlliklə şərtlənən müasirliyini üzə çıxarır.

İkinci bölmədə Azərbaycan ədəbi-tənqidinin tarixinə dair məqalələr toplanmışdır. Bu məqalələrdə M.F.Axundov, F.Köçərli, Ə.Hüseynzadə və XX əsr romantik sənətkarlarının ədəbi-tənqid sahəsindəki fəaliyyətləri polemik mövqedən araşdırılır və ümumiləşdirilir.

Üçüncü bölmədə isə müasir ədəbi prosesə dair son illərdə qələmə alınan və müəllifin əvvəlki kitablarında yer almayan məqalələri verilmişdir.

Bu il 50 yaşını yenicə qeyd edən Təyyar müəllimə elmi-pedaqoji fəaliyyətində və yaradıcılığında uğurlar arzulayırıq.

Şakir CƏFƏROV

Azərbaycan müəllimi.- 2010.- 6 avqust.- S.4.