Bölgələrdə yeni tədris ilinə hazırlıq işləri
görülür
ŞABRAN
Rayonun təhsil müəssisələrinin 2010-2011-ci dərs ilinə hazırlığı ilə əlaqədar müəyyən işlər görülmüşdür. Belə ki, təhsil şöbəsinin fəaliyyət planına uyğun olaraq ümumtəhsil məktəblərinin ehtiyac duyulan pedaqoji kadrlarla təmin olunmasına diqqət yetirilir. Təhsil müəssisələrinin cari və əsaslı təmiri aparılır. Bununla yanaşı, RTŞ-ın tabeliyində olan digər təhsil müəssisələrində daxili imkanlar hesabına cari təmir işləri aparılmaqdadır. Şabran Rayon Təhsil Şöbəsinin tabeliyində olan 49 ümumtəhsil məktəbinin, 3 məktəbəqədər və 5 məktəbdənkənar tərbiyə müəssisəsinin yeni dərs ilinə hazırlığı ilə bağlı əlaqədar təşkilatlar işə cəlb olunublar. Rayon icra hakimiyyətinin köməyilə qarşıya çıxan problemlər həll olunur. Şəhər orta məktəblərinin istilik sistemi hələ ötən dərs ilində yenidən qurulub. Kənd məktəblərinin yanacaqla təmin olunması üçün hazırlıq işləri başa çatıb, yaxın günlərdə bu işin icrasına başlanılacaq. Rayonun təhsil müəssisələrinin maddi-texniki təminatını yaxşılaşdırmaq məqsədilə 20.699 manatlıq bərk inventar alınaraq məktəblərə verilib.
Şagirdlər üçün 11.829 manatlıq dərslik komplekti məktəblərə paylanıb. Məktəbəqədər tərbiyə müəssisələri üçün "Çaşıoğlu - Multimedia" MMC-dən 4337,75 manatlıq vəsait gətirilib.
Milli Kurikulumun tətbiqi ilə bağlı 2010-2011-ci dərs ilində I siniflərdə dərs deyəcək müəllimlər üçün birhəftəlik təlim kursları keçirilib. Təlim kurslarını müvəffəqiyyətlə bitirən 62 nəfər müəllim sertifikat alıb. Hazırda Təhsil Nazirliyi tərəfindən təyinatla rayona göndərilən gənc mütəxəssislər kənd məktəblərində yerləşdirilir, onlar üçün lazım olan şərait yaradılır.
XIZI
Rayonda 8 tam orta, 6 ümumi orta, 1 uşaq gənclər idman məktəbi, 1 uşaq yaradıcılıq mərkəzi, 1 uşaq şahmat məktəbi və 8 məktəbəqədər təhsil müəssisəsi fəaliyyət göstərir.
Rayon təhsil şöbəsinin müdiri Oqtay Abdullayevdən aldığımız məlumata görə, 2010-2011-ci dərs ilinə hazırlıqla əlaqədar rayonun bütün umumtəhsil məktəblərində cari təmir işləri görülüb, ən ucqar kəndlərdə yerləşən Qarabulaq və Ağdərə kənd ümumi orta təhsil məktəbləri və Uşaq Gənclər İdman məktəbində cari təmir işləri aparılmışdır.
2009-2010-cu tədris ilində 100 illik yaşı olan Giləzi qəsəbə uşaq bağçası əsaslı təmir edilmiş, müasir avadanlıqlarla tam təmin olunmuş və körpələrin istifadəsinə verilmişdir. Eyni zamanda yeni dərs ilinə hazırlıqla əlaqədar bütün uşaq bağçalarında cari təmir işləri aparılmışdır.
Ötən tədris ilində
rayonun pedaqoji işçiləri
İKT üzrə
öyrədici treninqlərdən keçib.
Hazırda isə rayonun rəhbər təhsil işçiləri üçün İKT
üzrə
öyrədici treninqlər təşkil edilib.
2010-2011-ci tədris ilində
I siniflərdə dərs deyəcək ibtidai sinif müəllimləri
üçün 16-21 avqustda kurikulumla bağlı birhəftəlik
təlim kurslarının keçirilməsi
planlaşdırılıb.
Yeni tədris ili
üçün 21 adda 4441 nüsxə dərslik
alınmış və məktəblərə
paylanmışdır.
QAX
Rayonda məktəblərin
maddi-texniki bazasını möhkəmləndirmək
üçün bir sıra işlər
görülmüşdür. Baydarlı kəndində 360,
Almalı kəndində 480, şəhərdə 180 yerlik yeni
məktəb binaları, Çüdüllü kəndində
80 yerlik 4 əlavə sinif otağı tikilib istifadəyə
verilmişdir.
Rayonun təhsil müəssisələrində yeni dərs ilinə hazırlıq işlərinə cari ilin mart ayında başlanılmışdır. Təhsil şöbəsinin şura iclasında yeni dərs ilinə hazırlıqla bağlı tədbirlər planı müzakirə olunaraq təsdiq edilmişdir.
Ötən dərs ilində rayonun təhsil müəssisələrinin təmiri üçün ayrılmış 82 min manat büdcə vəsaiti hesabına şəhər 1, 5 nömrəli, Tasmalı, Alatəmir tam, Lələpaşa, Əmircan əsas məktəblərinin təmiri nəzərdə tutulmuşdur. Artıq şəhər 5 nömrəli, Tasmalı, Alatəmir, Əmircan, Lələpaşa məktəblərində döşəmələr dəyişdirilmiş, Alatəmir, Lələpaşa, Əmircan məktəblərində dam örtüyü yenisi ilə əvəz olunmuş, şəhər 1 nömrəli orta məktəbdə sanitar qovşağı tikilmiş, 2 nömrəli məktəbin ətrafında 130 m uzunluğunda hasarın tikintisi, rəngləmə, ağartma, suvaq işləri davam etdirilir. Şəhər 4 nömrəli, Qum, Güllük, Qıpçaq, İlisu, Qaxbaş kənd 1, 2 nömrəli, Marsan, Qaxingiloy, Sarıbaş, Çüdüllü, İbaxlı məktəblərində də təmir işləri aparılır, şəhər 3 nömrəli, Turaclı, Fıstıqlı, Çinarlı, Lələpaşa, Qaradolaq məktəblərində isə cari təmir işləri artıq başa çatdırılıb.
Məktəblərin yeni dərs ilinə hazırlığı prosesində ayrılmış büdcə vəsaitindən başqa yerli bələdiyyələrin və pedaqoji kollektivlərin də yaxından köməkliyi olmuşdur. Zəyəm, Cəlayır, Qaratala, Qaşqaçay, Qaxingiloy, Sarıbaş, Qıpçaq bələdiyyələrinin müsbət işini qeyd etmək olar. Məktəblərin yeni dərs ilinə nümunəvi hazırlığını təmin etmək üçün Təhsil Nazirliyinin verdiyi 60 adda 16954 dərslik, 300 ədəd dəmir soba gətirilmiş, bölgü əsasında yerlərə çatdırılmasına başlanmışdır.
İcbari təhsil fondu hesabına rayonun ümumtəhsil məktəblərində oxuyan imkansız, bir və ya hər iki valideynini itirmiş şəhid və Qarabağ müharibəsi veteranlarının uşaqlarına, valideyn himayəsindən məhrum olmuş 1333 nəfər şagirdə 145 min manat məbləğində məktəbli formasının, dərs ləvazimatlarının və s. alınıb verilməsi nəzərdə tutulub.
Nizami MİRZƏ,
Rəşad ZİYADOV
Azərbaycan müəllimi.- 2010.- 20 avqust.- S.2.