Xarici ölkələrin nüfuzlu ali məktəblərinə qəbul olunan tələbələrlə görüş keçirildi

Avqustun 20-də Təhsil Nazirliyində "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində dünyanın nüfuzlu ali məktəblərinə qəbul olunan tələbələrlə görüş keçirildi.

Tədbiri təhsil naziri Misir Mərdanov açaraq qonaqları və xarici ölkələrin tanınmış ali məktəblərinə qəbul olunan gəncləri Təhsil Nazirliyində görməkdən məmnunluq hissi keçirdiyini bildirdi.

Azərbaycan gənclərinin ölkəmizdən kənarda ali təhsil almalarının hər zaman prioritet məsələlərdən biri olduğunu söyləyən nazir xüsusən ötən əsrin 70-80-ci illərində ümummilli liderimiz Heydər Əliyevin təşəbbüsü ilə hər il 1000-1500 tələbənin keçmiş SSRİ-nin ən nüfuzlu ali məktəblərinə göndərildiyini diqqətə çatdırdı. Təhsil naziri əbədiyaşar liderin yenidən hakimiyyətə qayıdışından sonra da həmin məsələyə xüsusi önəm verdiyini və Azərbaycan gənclərinin dövlət qayğısı ilə əhatə olunduğunu qeyd etdi. Nazir bu ənənənin ölkə başçısı cənab İlham Əliyev tərəfindən layiqincə davam etdirildiyini söylədi. Təhsil naziri hazırda ümumilikdə 10000-dən çox azərbaycanlı gəncin dünyanın aparıcı universitetlərində təhsil aldığını vurğuladı. Qeyd olundu ki, ölkə Prezidenti cənab İlham Əliyevin 16 aprel 2007-ci il tarixli, 2090 nömrəli Sərəncamı ilə təsdiq olunmuş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın əsas məqsədi rəqabətqabiliyyətli iqtisadi sistemin formalaşdırılması və davamlı inkişafın təmin edilməsi baxımından ölkəmizin müasir tələblərə cavab verən kadrlara ehtiyacının ödənilməsi, Azərbaycan gənclərinin ümumbəşəri dəyərlər əsasında layiqli ali təhsil almaları üçün lazımi şəraitin yaradılması, istedadlı gənclərin dünyanın aparıcı ölkələrində təhsil almaq imkanlarının genişləndirilməsi prosesinin mütəşəkkilliyinin və səmərəliliyinin artırılmasını təmin etməkdən ibarətdir.

2007-ci ildən etibarən adıçəkilən Dövlət Proqramı Təhsil Nazirliyi tərəfindən uğurla həyata keçirilməkdədir. Dövlət Proqramının şərtlərinə əsasən həmin tələbələrin bütün xərcləri dövlət tərəfindən ödənilir.

Nazir Misir Mərdanov məlumat üçün bildirdi ki, Dövlət Proqramının icrasına başlandığı vaxtdan 512 gənc təhsil almaq üçün müxtəlif xarici ölkələrin ali məktəblərinə göndərilib. 2007-ci ildə Dövlət Proqramı çərçivəsində 66, 2008-ci ildə 137, 2009-cu ildə 309 tələbə xarici ölkələrin nüfuzlu ali məktəblərində təhsil alırdısa, 2010-cu ildə onların sayının təxminən 200 olacağı nəzərdə tutulur.

Təhsil naziri Dövlət Proqramı çərçivəsində təhsil alanlardan 32 nəfərin artıq məzun olduğunu, onların müxtəlif dövlət və özəl qurumlarda işlə təmin edildiklərini bildirdi.

Nazir Misir Mərdanov daha sonra "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"na uyğun olaraq azərbaycanlı gənclərin təhsil aldıqları xarici ölkələr, seçdikləri ixtisaslar barədə statistik məlumatları görüş iştirakçılarının nəzərinə çatdırdı. Verilən məlumatdan aydın oldu ki, hazırda Dövlət Proqramı çərçivəsində dünyanın 22 ölkəsinin yüksək reytinqə malik olan 154 ali məktəbində təhsilin müxtəlif pillələrində 447 nəfər oxuyur. Onlar doktorantura pilləsi üzrə sosial elmlər, mühəndislik, tibb və informasiya-telekommunikasiya texnologiyaları, magistratura pilləsi üzrə isə iqtisadiyyat və idarəetmə, sosial elmlər, hüquqşünaslıq, informasiya - telekommunikasiya texnologiyaları, mühəndislik, tibb və s. ixtisasları üzrə təhsil alırlar.

Nazir respublikamızın kadrlara olan tələbatının nəzərə alınaraq növbəti tədris ilindən etibarən gənclərin xarici ölkələrə göndərilərkən informasiya texnologiyaları, mühəndislik, neft sənayesi, tibb, riyaziyyat, fizika, biologiya və kimya ixtisasları üzrə mütəxəssis kimi hazırlanmalarına üstünlük veriləcəyini bildirdi.

Təhsil naziri Misir Mərdanov çıxışının sonunda bütün gənclərə yüksək bilik almaqla bərabər, respublikamızı təhsil aldıqları ölkələrdə layiqincə təmsil etməyi, Azərbaycan həqiqətlərinin dünya ictimaiyyətinə düzgün çatdırılması işində fəallıq göstərmələrini, doğma Vətənə peşəkar mütəxəssislər kimi dönmələrini tövsiyə edərək onlara bu çətin və məsuliyyətli işlərində uğurlar arzuladı.

Görüşdə iştirak edən xarici işlər nazirinin müavini, Azərbaycan Diplomatik Akademiyasının rektoru, professor Hafiz Paşayev, Azərbaycan Respublikası Prezidenti Administrasiyasının xarici əlaqələr şöbəsinin müdiri Novruz Məmmədov, Azərbaycan Respublikası Diasporla İş üzrə Dövlət Komitəsinin sədri Nazim İbrahimov, Milli Məclisin beynəlxalq əlaqələr komitəsinin sədri, Azərbaycan Dillər Universitetinin rektoru, professor Səməd Seyidov xarici ölkələrin aparıcı ali məktəblərində təhsil almaq imkanı qazanan gənclərə təhsillərində nailiyyətlər diləyərək, onlara ən xoş istəklərini çatdırdılar.

ABŞ-ın Corc Vaşinqton Universitetində beynəlxalq münasibətlər ixtisası üzrə təhsil alan Elvin Hacıyev, Böyük Britaniyada fəaliyyət göstərən Avropa - Azərbaycan Cəmiyyətinin sədr müavini Emil Ağazadə, Fransanın Paris II Universitetində fizika ixtisası üzrə təhsil alan Nizami Abbasov, Sinqapurun Nanyanq Texnologiya Universitetində tətbiqi fizika ixtisası üzrə təhsil alan Pərviz Hacıyev, İ.M.Seçenov adına Moskva Tibb Akademiyasında ürək-damar cərrahiyyəsi ixtisası üzrə aspirantura pilləsində təhsil alan Səbuhi Dadaşov və başqaları çıxışlarında onların yüksək təhsil almaları üçün yaradılan geniş imkan və şəraitə, göstərilən diqqət və qayğıya görə ölkə başçısı cənab İlham Əliyevə öz minnətdarlıqlarını bildirdilər. Gənclər onlara böyük etimad göstərdiyinə görə təhsil naziri Misir Mərdanova, həmçinin bu gözəl missiyanın həyata keçirilməsində əməyi olan bütün şəxslərə təşəkkür etdilər.

Görüşün sonunda tələbələri maraqlandıran suallara cavablar verildi, onların fikir və təklifləri dinlənildi.

Samirə KƏRİMOVA

Azərbaycan müəllimi.- 2010.- 27 avqust.- S.2.