Ali məktəbə qəbul olmuş tələbələrlə görüş

Bu il Masallı məktəblərini 2035 şagird bitirib. Məzunlardan 650 nəfəri ali məktəblərə qəbul üçün müraciət etmiş, onlardan 223 nəfəri tələbə adını qazanıb.

Elə bu münasibətlə Masallı Rayon İcra Hakimiyyətinin başçısı Qəzənfər Ağayevin yüksək nəticə əldə edərək tələbə adını qazanmış məzunlarla görüşü keçirilib. Tədbir, iştirakçıların ulu öndər Heydər Əliyevin abidəsini ziyarət etməsi və abidə önünə təzə-tər güllər düzməsi ilə başlanılıb. Daha sonra məzunlar Heydər Əliyev muzeyində ümummilli liderin keçdiyi şərəfli ömür yolu ilə tanış olublar. Tədbiri açan rayon icra hakimiyyətinin başçısı Qəzənfər Ağayev ali məktəblərə qəbul imtahanlarında yüksək nəticə əldə edərək tələbə sevincini yaşayan məzunları təbrik edib, onlara təhsillərində uğurlar diləyib. Daha sonra natiq təhsilə dövlət qayğısından söhbət açmış, ölkə rəhbəri İlham Əliyev cənablarının Azərbaycan təhsilinə daim önəm verdiyini vurğulayıb. Rayon təhsil şöbəsinin müdiri Astan İbişov, S.Tağıyev adına Digah orta məktəbinin direktoru Nailə Əsədullayeva, Qəhrəman İsmayılov adına Şərəfə orta məktəbinin direktoru Taleh Əkbərov, Bakı Dövlət Universitetinin II kurs tələbəsi, Prezident təqaüdçüsü Nigar Əliyeva, Azərbaycan Dövlət Pedaqoji Universitetinin tələbəsi Nərmin Adilzadə və başqaları çıxışlarında təhsilə göstərilən diqqət və qayğıya görə ölkə və rayon rəhbərliyinə minnətdarlıqlarını bildiriblər. Tədbirdə ali məktəblərə qəbulda yüksək nəticə əldə etmiş 34 tələbəyə rayon icra hakimiyyəti başçısının pul mükafatı və fəxri fərmanlar təqdim olunub. Üç tələbəyə isə ali təhsil aldığı müddətdə rayon icra hakimiyyəti başçısının aylıq təqaüdü təyin edilib. Həmin tələbələr Masallı şəhər 3 nömrəli orta məktəbin məzunu, 655 balla Azərbaycan Dövlət İqtisad Universitetinə daxil olmuş Baxışov Qəyyum Mehman oğlu, E.Ağayev adına Hişkədərə kənd orta məktəbinin məzunu, 640 balla Qafqaz Universitetinə daxil olmuş Cabbarlı Azər Əlövsət oğlu, keçən il Azərbaycan Dövlət Universitetinə yüksək balla daxil olmuş, Prezident təqaüdçüsü Əliyeva Nigar Sakif qızıdır.

Tədbirin sonunda tələbə adını uğurla qazanan məzunlar rayon icra hakimiyyəti başçısı ilə xatirə şəkli çəkdiriblər. Məzunlar qarşısında konsert proqramı ilə çıxış edən incəsənət ustaları tələbələrə sevinc bəxş ediblər.

Ədalət DAŞDƏMİRLİ

Azərbaycan müəllimi.- 2010.- 27 avqust.- S.5.