Latın Amerikasından ilk qonaq

Braziliyanın Azərbaycandakı fövqəladə və səlahiyyətli səfiri Paulo Antonio Pereira Pinto Naxçıvan Muxtar Respublikasına rəsmi səfəri çərçivəsində Naxçıvan Dövlət Universitetində də olmuşdur. Universitetin rektoru, akademik İsa Həbibbəylinin qəbulunda olan səfir Azərbaycan və Naxçıvan haqqında xoş təəssüratlarını bölüşmüşdür.

Görüş zamanı 1993-cü ildə qurulan Azərbaycan və Braziliya arasındakı diplomatik münasibətlərin inkişafından, 2009-cu ildə açılan Braziliya səfirliyinin bu istiqamətdə atdığı addımlardan danışılmışdır. Millət vəkili, akademik İsa Həbibbəyli Braziliyanın neytral siyasət yürüdən, çoxmədəniyyətli və zəngin tarixə malik ölkə olduğunu vurğulamış, Naxçıvanın qədim tarixindən, mədəniyyətindən, ermənilər tərəfindən uzun illər mühasirədə olmasına baxmayaraq, misligörünməmiş inkişafından söz açmışdır. Rektor universitetin strukturu, maddi-texniki bazası, professor-müəllim heyəti və tələbə kontingenti, elm və tədrisin inkişafında qazandığı uğurlar haqqında da ətraflı məlumat vermişdir.

Braziliyalı diplomat öz ölkəsinin Azərbaycanın ərazi bütövlüyünə, müstəqilliyinə, milli mənəvi dəyərlərinə hörmətlə yanaşdığını diqqətə çatdırmışdır.

Görüş zamanı elmin, təhsilin inteqrasiyası məqsədi ilə tərəfdaşlığın əhəmiyyəti vurğulanmış, universitetlərarası əməkdaşlığın yaradılması haqqında razılıq əldə olunmuşdur.

Səfir Paulo Antonio universitetin struktur bölmələri, tədris korpusları ilə tanış olmuş, Beynəlxalq münasibətlər və xarici dillər fakültəsində, Olimpiya idman mərkəzində, İdman muzeyində olmuş, konservatoriyada mini konsert proqramını izləmişdir.

Mehriban SULTAN

Azərbaycan müəllimi.- 2010.- 3 sentyabr.- S.1.