Musiqi Kollecində gənc

ifaçıların müsabiqəsi keçirilir

Azərbaycan Milli Konservatoriyasının nəzdində Musiqi Kollecində dahi bəstəkarımız Üzeyir Hacıbəylinin 125 illik yubileyinə həsr olunmuş gənc ifaçıların müsabiqəsi keçirilir. 3 günlük proqram üzrə təşkil olunan müsabiqənin açılışı dekabrın 1-də Musiqi Kollecinin böyük zalında oldu. Mərasimi Musiqi Kollecinin direktoru, Azərbaycan Respublikasının əməkdar incəsənət xadimi, professor Nazim Kazımov açaraq müsabiqə iştirakçılarını və qonaqları salamladı, Azərbaycan Prezidentinin sərəncamına əsasən bu il 125 illiyi bütün ölkədə geniş qeyd olunan Üzeyir Hacıbəyliyə həsr etdikləri növbəti tədbirə yığışdıqlarını bildirdi.

N.Kazımov diqqətə çatdırdı ki, Musiqi Kollecinin kollektivi indiyədək dahi bəstəkarın yubileyi münasibəti ilə iki böyük tədbir keçirib. Kollecin tələbələri bu ilin aprelində Azərbaycan Dövlət Filarmoniyasında Üzeyir Hacıbəylinin adını daşıyan Simfonik Orkestrin müşayiəti ilə konsert veriblər. May ayında isə Rəşid Behbudov adına Mahnı Teatrında kollecin tələbələrinin Ü.Hacıbəyliyə həsr olunmuş konserti olub. Açılışına toplaşdıqları gənc ifaçıların müsabiqəsi bu silsilədən üçüncü tədbirdir.

Kollecin direktoru klassik musiqimizin banisi, Azərbaycan musiqi elminin əsasını qoyan, bəstəkar, dirijor, müəllim, publisist Üzeyir Hacıbəylinin musiqi mədəniyyətimizin inkişafındakı böyük rolundan söz açaraq, Azərbaycan musiqisinin yüksək səviyyəyə çatmasında, dünya miqyasında diqqətəlayiq nailiyyətlər əldə etməsində Üzeyir Hacıbəylinin misilsiz xidmətləri olduğunu söylədi.

Ü.Hacıbəylinin Azərbaycanda milli musiqi kadrlarının hazırlanmasına böyük önəm verdiyini xüsusi qeyd edən professor N.Kazımov onun bu sahədə yorulmadan çalışdığını, müxtəlif illərdə iki dəfə Musiqi Kollecinə rəhbərlik etdiyini, kollecin direktoru olduğu dövrlərdə onun maddi-texniki bazasının möhkəmləndirilməsi, milli kadrlarla təmin olunması və buraya istedadlı azərbaycanlı gənclərin cəlbi istiqamətində məqsədyönlü tədbirlər həyata keçirdiyini vurğuladı. N.Kazımov çıxışının sonunda müsabiqəyə qoşulmuş gənc ifaçılara uğurlar arzuladı.

Mərasimdə kollecin musiqi nəzəriyyəsi ixtisası üzrə müəllimi, sənətşünaslıq namizədi, dosent Xatirə Həsənzadə Üzeyir Hacıbəylinin həyat və yaradıcılığı haqqında məlumat verdi.

Ulu öndərimiz Heydər Əliyevin hər bir xalqın özünəxas xüsusiyyətlərini təcəssüm etdirən mədəniyyətin ölkəmizdə inkişafına böyük diqqət və qayğı göstərdiyini, bu siyasətin onun varisi, Azərbaycan Prezidenti İlham Əliyev tərəfindən uğurla davam etdirildiyini deyən X.Həsənzadə böyük sənətkarımız Üzeyir Hacıbəylinin 125 illik yubileyinin də məhz Prezidentin sərəncamı ilə ölkəmizdə geniş qeyd olunduğunu, bu məqsədlə silsilə tədbirlər keçirildiyini diqqətə çatdırdı. Həmin tədbirlər arasında Musiqi Kollecinin tədbirlərinin xüsusi yeri olduğunu bildirdi.

X.Həsənzadə Ü.Hacıbəylinin musiqi incəsənətimizin inkişafı üçün gördüyü işlərdən danışdı, onu böyük tədqiqatçı alim, musiqi xadimi və ictimai xadim kimi səciyyələndirdi, yubileyi ilə bağlı keçirilən müsabiqəni ən önəmli tədbirlərdən biri adlandırdı. Məruzəçi çıxışının sonunda müsabiqənin gənc ifaçıların taleyində yeni səhifə olacağına əminliyini ifadə etdi, tədbirin təşkilatçılarına minnətdarlığını bildirdi.

Sonra Musiqi Kolleci tələbələrinin müsabiqənin açılışına həsr edilmiş konserti oldu. Müxtəlif kurslarda təhsil alan tələbələrin, onlardan ibarət skripkaçılar ansamblının ifa etdikləri Ü.Hacıbəylinin "Arazbari", Ş.Qardeninin "Sehrli bağın melodiyası", xalq mahnısı "Sarı gəlin", C.Hacıyevin "Ballada", habelə "Dilkəş ahəngi" və b. musiqi nömrələri mərasim iştirakçıları tərəfindən maraqla izlənildi və alqışlandı.

Konsertdən sonra müsabiqədəki çıxışların sıra ardıcıllığını müəyyənləşdirmək üçün püşkatma keçirildi.

Məlumat üçün bildirək ki, təsdiq olunmuş proqrama əsasən müsabiqə iki turda təşkil olunub. Birinci tur dekabrın 1-də açılış mərasimindən sonra keçirilib. İkinci tur isə bu gündür.

Müsabiqə iştirakçılarının çıxışları Bakı Musiqi Akademiyasının dosenti Məmməd Quliyevin rəhbərlik etdiyi münsiflər heyəti tərəfindən qiymətləndiriləcək, qaliblərə müvafiq diplom və hədiyyələr təqdim olunacaq.

Müsabiqənin açılış mərasimində Azərbaycan Milli Konservatoriyasının prorektoru, professor Akif Quliyev, respublikanın əməkdar müəllimi Elmira Paşayeva, paytaxtın, Sumqayıtın musiqi kollecləri və məktəblərindən qonaqlar iştirak edirdilər.

Yusif ƏLİYEV

Azərbaycan müəllimi.- 2010.- 3 dekabr.- S.7.