Bakı Dövlət Universitetinin rektoru

İranın yeni səfirini qəbul edib

BDU-nun rektoru, akademik Abel Məhərrəmov İran İslam Respublikasının ölkəmizə yeni təyin olunmuş fövqəladə və səlahiyyətli səfiri Məmmədbağır Bəhramini qəbul edib. BDU-nun yaranma tarixi, inkişaf mərhələləri, beynəlxalq əlaqələri haqqında danışan rektor universitetin İran İslam Respublikasının ali təhsil ocaqları ilə ikitərəfli əlaqələrindən bəhs edib. Səfirin həm elm və təhsil, həm də diplomatiya sahəsində fəaliyyətini yüksək qiymətləndirən rektor, bu görüşün ölkələrarası əlaqələrə, o cümlədən elm və təhsilin inkişafına xüsusi töhfə verəcəyini bildirib. Azərbaycanın İranla dost və qardaş ölkə olduğunu, bu münasibətlərin hər iki ölkə Prezidenti səviyyəsində davam etdiyini də xüsusi vurğulayıb.

BDU-da 60 ildən çoxdur ki, fars dili və ədəbiyyatının tədris olunduğunu bildirən A.Məhərrəmov qeyd edib ki, son illərdə doktoranturada təhsil almaq istəyən iranlı tələbələrin sayı artıb. Bu, elmi müstəvidə əməkdaşlığın genişlənməsindən, əlaqələrin formalaşmasından xəbər verir.

Rektor həmçinin Dağlıq Qarabağ problemindən danışıb və münaqişənin həlli istiqamətində müsəlman dövlətlərinin birlik və bərabərliyinin xüsusi əhəmiyyətini qeyd edib.

Səfir M.Bəhrami Azərbaycanla İranın sivilizasiyaya, mədəniyyətə, eyni dinə malik qardaş və dost ölkələr olduğunu bildirib, əlaqələrin, xüsusən elm sahəsində münasibətlərin daha sıx olmasının vacibliyini diqqətə çatdırıb. Səfir Bakı Dövlət Universiteti ilə Tehran Universitetinin daha sıx əməkdaşlığında, tələbə, müəllim mübadiləsində, birgə konfranslar və layihələrin həyata keçirilməsində maraqlı olduğunu bildirib. Qeyd edib ki, universitetlərarası əlaqələr nə qədər güclü olsa, bu, birlik üçün o qədər əhəmiyyətlidir. Dağlıq Qarabağ münaqişəsindən danışan səfir əlavə edib ki, onun dövləti münaqişənin Azərbaycanın ərazi bütövlüyü çərçivəsində həllini istəyir.

Rektor, akademik Abel Məhərrəmov səfirin təkliflərinə böyük önəm verdiyini, nanotexnologiya, mikrobiologiya, tibb sahəsində, eləcə də digər sahələrdə əməkdaşlığın daha səmərəli və sıx olmasının vacibliyini qeyd edib.

Sonda səfir akademik Abel Məhərrəmovu, rektor isə, öz növbəsində, Tehran Universitetinin rektorunu ölkələrinə dəvət ediblər. Qərara alınıb ki, həmin görüşlərdə universitetlərarası əməkdaşlıq məsələlərini nəzərdə tutan müqavilə imzalansın.

BDU-nun Mətbuat və informasiya şöbəsi

Azərbaycan müəllimi.- 2010.- 3 dekabr.- S.2.