"Təhsil nailiyyətlərinin qiymətləndirilməsi

üzrə magistratura proqramı"

Dekabrın 2-də Təhsil Nazirliyi Azərbaycan Dövlət Pedaqoji Universitetinin Pedaqoji fakültəsində Dünya Bankının dəstəyi ilə "Təhsil nailiyyətlərinin qiymətləndirilməsi üzrə magistratura proqramı" mövzusunda tədbir keçirdi. Tədbirdə Təhsil Nazirliyinin Monitorinq və qiymətləndirmə şöbəsinin əməkdaşları, pedaqoji fakültənin professor - müəllim heyəti və qonaqlar iştirak edirdilər.

ADPU-nun pedaqoji fakültəsinin dekanı, professor Fərrux Rüstəmov tədbirin əhəmiyyətindən danışaraq bildirdi ki, qiymət müəllimin öyrənənin şəxsiyyətinə təsir göstərmək, onu təlimə istiqamətləndirmək və motivləşdirmək məqsədilə istifadə etdiyi çox qüvvətli amildir.

Obyektiv qiymət təhsilalanda adekvat özünüqiymətləndirmə və öz fəaliyyətinə, onun nəticələrinə tənqidi münasibət formalaşdırır. Müasir dövrdə ali təhsil sistemində pedaqoji sistemin bütün elementlərini aşkarlamağa imkan verən diaqnostik texnologiyaların yaradılması sahəsində ciddi axtarışlar aparılır.

Professor Fərrux Rüstəmov onu da əlavə etdi ki, respublikada ilk dəfə pedaqoji fakültənin ibtidai sinif müəllimi ixtisasında "Təhsil nəticələrinin qiymətləndirilməsi" fənni 30 saat həcmində tədris olunur və universitetdə "Azərbaycan Respublikasının ümumi təhsil sistemində qiymətləndirmə konsepsiyası", təlim- tərbiyə prosesində monitorinq və qiymətləndirmə və s. öyrədilir.

Dünya Bankının beynəlxalq məsləhətçisi Algirdas Zabulionis sözügedən proqram barəsində ətraflı çıxış etdi və təhsil nailiyyətlərinin qiymətləndirilməsi sahəsində elmi- nəzəri yanaşmaları və onun xüsusiyyətlərini şərh etdi. Həmçinin təhsildə qiymətləndirmə üzrə magistratura proqramlarının ümumi məqsədlərini söylədi . Təhsil üzrə bakalavriat məzunlarına təklif edilən ikiillik magistratura kursu təhsildə nailiyyətlərin qiymətləndirilməsinin əsas prinsiplərini dərk etməyə imkan yaradır.

Tədbirdə ADPU-nun professoru Seyidağa Həmidov, dosent Yaqut Rzayeva, fizika-riyaziyyat və informatika təmayüllü liseyin direktoru, fizika-riyaziyyat elmləri üzrə fəlsəfə doktoru Tariyel Talıbov və başqaları çıxış etdilər.

Tədbir diskussiya formasında başa çatdı.

Şakir CƏFƏROV

Azərbaycan müəllimi.- 2010.- 3 dekabr.- S.3.