Sənət adamları

məktəblilərin qonağı oldular

Dekabrın 4-də Bakıdakı 151 nömrəli orta ümumtəhsil məktəbində xalq artistləri Rafiq Əzimov, Firəngiz Mütəllibova, Rəfael Dadaşov, Azərbaycan Dövlət Dram Teatrının ədəbi hissəsinin müdiri, teatrşünas Atababa Hacıbabayev və teatrın direktor müavini Azər Mirzəyevlə görüş keçirildi.

Tədbiri giriş sözü ilə məktəbin direktoru Kifayət Tanrıverdiyeva açaraq şagirdlərin sənət adamları ilə görüşünü əlamətdar hadisə kimi qiymətləndirdi. Qonaqlara pedaqoji kollektiv adından minnətdarlığını bildirərək qeyd etdi ki, məktəbdə belə görüşlərin gələcəkdə tez-tez keçirilməsi nəzərdə tutulub.

Tədbirin aparıcıları sənət adamları barədə iştirakçılara geniş məlumat verdilər. Sonra onların həyat və yaradıcılığı haqqında film nümayiş olundu.

Şagirdlər sənət adamlarının ifa etdikləri rollardan səhnəciklər göstərdilər. Aktyorlar həyat və yaradıcılıqları barədə suallara cavab verdilər.

Məktəbin 10-cu sinif şagirdi Fatimə Şirəliyevanın ifasında bir-birindən maraqlı mahnılar tədbir iştirakçıları tərəfindən rəğbətlə qarşılandı.

Şagirdlərdən Fərhad və Növrəstənin təqdimatında Hüseyn Cavidin "Qız məktəbi" şeirindən bir parça səsləndirildi.

Tədbirin sonunda şagirdlər sənət adamları ilə birlikdə xatirə şəkli çəkdirdilər.

Rəşad ZİYADOV

Azərbaycan müəllimi.- 2010.- 10 dekabr.- S.12.