Şagirdlər fəallığı

ilə seçilirdilər

Bakıdakı 236 nömrəli orta məktəbin VI sinfində "Adi kəsrlərin üzərində bütün əməllərə aid məsələlərin həlli" mövzusunda "açıq dərs" keçirildi. Fənn müəllimi Şəhla Əhmədova bildirdi ki, adi kəsrlərin toplanması, çıxılması, vurulması, bölünməsi, ədədi hissəsinin tapılması şagirdlərin məntiqi, riyazi təfəkkürünü dərinləşdirmək, yazı və nitqdə ümumi, eləcə də riyazi mədəniyyət baxımından çox əhəmiyyətlidir.

Şagirdlərin davamiyyəti yoxlandıqdan sonra motivasiya ilə "açıq dərs"ə start verildi. Şagirdlərə lazım olan vəsaitlər paylandı. Ümumiləşdirici təkrarı aparmaq üçün söz assosiasiyasından istifadə olundu. Kəsrlərin toplanması, çıxılması, vurulması, bölünməsi terminləri yazılmış konvertdən biri şagirdlər tərəfindən seçildi. Həmin termin lövhədə yazılandan sonra 4-5 dəqiqə ərzində bu terminin yaratdığı assosiasiya şagirdlər tərəfindən söylənildi.

Sonra lövhəyə 8 şagird dəvət olundu və onlar iki qrupa bölündü. Hər şagirdə üzərində ədəd yazılmış tablo verildi. Şərtə görə, hər şagird qrupda özünün tərs ədədini axtarmağa başladı. Sonra yoldaşlarına seçimin doğru olduğunu izah etməyə çalışdılar.

"Açıq dərs"in növbəti mərhələsində lövhəyə ardıcıl olaraq 4 məsələ yazıldı. Şagirdlər məsələləri həll edərkən stolun üstündəki qırmızı, göy, yaşıl bayraqlardan istifadə etdilər. Hər məsələnin həlli lövhədə yazıldı.

Sonra sinifdəki şagirdlər, hər qrupda 4 nəfər olmaqla, 6 qrupa bölündü. Üzvlərin arzusu ilə qrupların lideri seçildi. Hər qrupa üzərində şəkil ("Əkin sahəsi", "Nənə və nəvənin söhbəti", "Neft buruqları", "Dəhşətli günlər", "Azərbaycan xəritəsi", "Qlobus", "Futbol meydançasında") çəkilmiş vərəqlər təqdim edildi.

Qruplar üzrə şəkil əsasında məsələ tərtib edildi. Məsələnin həlli üçün ayrılmış vaxt bitəndən sonra şagirdlər tapşırığın həllini yoldaşlarına izah etdilər. Hər qrupun işi digər şagirdlər tərəfindən qiymətləndirildi və məsələlərin həllinin daha optimal variantı ilə bağlı təkliflər söylənildi. Sonda dərsin yekunlaşdırıcı mərhələsi oldu və izahlı şəkildə evə tapşırıqlar verildi. Şagirdlərin "açıq dərs"dəki fəaliyyəti hazırlanmış meyarlara əsasən qiymətləndirildi.

"Açıq dərs"in sonunda şagirdlərinə məsələlərin həllinə operativ münasibətindən razılıq edən fənn müəllimi Şəhla Əhmədova bildirdi ki, təhsilə göstərilən qayğı onların gələcəkdə Azərbaycanın ləyaqətli vətəndaşı olmalarına yönəlib. Ona görə də siz bütün dərslərinizə beləcə diqqət və məsuliyyətlə yanaşmalısınız ki, qarşıya qoyduğunuz hədəflərə asanlıqla çata biləsiniz.

Vasif SÜLEYMAN

Azərbaycan müəllimi.- 2010.- 17 dekabr.- S.11.