"Mübarizləri olan

Vətən basılmaz"

Bu günlərdə Respublika Gənc Turistlər və Diyarşünaslıq Mərkəzində məktəbliləri vətənpərvər, azərbaycançılıq ruhunda tərbiyə etmək, onları müstəqillik uğrunda mübarizədə şəhid olan qəhrəmanların həyat yolunu öyrənməyə sövq etmək məqsədilə Azərbaycanın Milli Qəhrəmanı Mübariz İbrahimov və "İgidliyə görə" medalı verilmiş (ölümündən sonra) baş leytenant Fərid Əhmədova həsr edilmiş "Mübarizləri olan Vətən basılmaz" adlı tədbir keçirilib. Tədbirdə Bakıdakı 86, 254, 264, 249, 27,171, 58, 144, 244, 12, 45 nömrəli ümumtəhsil məktəblərində fəaliyyət göstərən mərkəzlərin dərnək və valideyn şuralarının üzvləri, sinif və Uşaq Birliyinin rəhbərləri iştirak ediblər.

Tədbirdə RGTDM-nin direktor müavini S.Allahverdiyeva qəhrəmanların həyat yolundan və göstərdikləri şücaətlərindən danışıb. Bildirib ki, Azərbaycan xalqı qəhrəman oğullarını heç vaxt unutmayacaq və onları həmişə qəlbində yaşadacaqdır.

Burada məktəblilər tərəfindən ədəbi-bədii kompozisiya göstərilib və qəhrəmanlara həsr olunmuş şeirlər söylənilib.

Tədbir iştirakçıları qəhrəmanlara aid fotosərgiyə baxdıqdan sonra 2 nömrəli Fəxri və Şəhidlər xiyabanlarına gələrək qəhrəmanların məzarları üstünə gül dəstələri qoyublar.

Şakir CƏFƏROV

Azərbaycan müəllimi.- 2010.- 17 dekabr.- S.7.