"Bakı və regionlarda təhsilin keyfiyyətinin

yaxşılaşdırılmasında valideynlərin iştirakı"

layihəsi ilə bağlı mətbuat konfransı

Dekabrın 15-də Bakıdakı "Caspian Plaza" otelində Azərbaycan Milli Valideyn-Müəllim Assosiasiyasının Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə reallaşan "Bakı və regionlarda təhsilin keyfiyyətinin yaxşılaşdırılmasında valideynlərin iştirakı" layihəsi ilə bağlı mətbuat konfransı keçirildi. Tədbirdə bir sıra məktəb rəhbərləri, təhsil ocaqlarındakı VMA-nın üzvləri və KİV nümayəndələri iştirak edirdilər. Qeyd edək ki, layihənin keçirilməsində məqsəd valideynlərin məktəbə cəlbi, təhsil prosesinə fəal ictimai nəzarət vasitəsilə təhsilin keyfiyyətinin yaxşılaşdırılmasına töhfələr vermək və valideyn-müəllim əməkdaşlığını gücləndirməklə şagirdlərin təlim-tərbiyəsinin səmərəliliyini artırmaqdan ibarətdir.

Layihənin keçirilməsi haqqında məlumat verən Milli VMA-nın icraçı direktoru Təranə Şərifova bildirdi ki, layihə iki mərhələdən ibarətdir. Təhsil Nazirliyi və Bakı Şəhəri üzrə Təhsil İdarəsinin rəhbərləri ilə məsləhətləşmələrdən sonra paytaxt və region məktəblərinə səfərlərin qrafiki dəqiqləşdirilib.

Layihənin birinci mərhələsi üzrə Milli VMA-nın ekspertləri Şahin Rəcəbov və Lalə Rzayevanın iştirakı ilə Bakının 20, 46 nömrəli məktəblərində müəllim, şagird və valideynlərlə görüş, sosioloji sorğu və valideyn-şagird-müəllim əməkdaşlığına dair təlimlər keçirilib. İşci qruplarda məktəblərdəki mövcud vəziyyət qiymətləndirilib və ehtiyaclar müəyyənləşdirilib. Valideyn-müəllim-şagird əməkdaşlığına dair 1000 ədəd poster-plakatlar hazırlanaraq çap olunub.

Layihənin ikinci mərhələsində ekspertlər Mingəçevir, Gəncə, Ağdam, Lənkəran, Masallı və Quba şəhərlərindəki məktəblərdə analoji görüş, sorğu və təlimlər keçirib. İşçi qruplarda və müzakirələrdə ekspertlər region məktəblərindəki ehtiyacları müəyyənləşdirib və sorğuların nəticələri təhlil olunaraq ümumiləşdirilib, təkliflər paketi hazırlanaraq müvafiq dövlət orqanlarına təqdim olunub.

Sonra Milli VMA-nın eksperti Şahin Rəcəbov layihə ilə bağlı statistik məlumatları diqqətə çatdırdı.

Çıxış edənlər layihənin həyata keçirilməsini təqdirəlayiq hal kimi qiymətləndirdilər. Qeyd edildi ki, belə layihələr məktəblərdə valideyn-müəllim münasibətlərinin inkişafına səbəb olur. Mövzu ətrafında müzakirələr aparıldı, bir sıra təkliflər bildirildi.

Niyazi RƏHİMOV

Azərbaycan müəllimi.- 2010.- 17 dekabr.- S.5.