Milli TEMPUS İnformasiya

Gününə həsr olunmuş konfrans

Dekabrın 15-də Azərbaycan Dillər Universitetində Milli TEMPUS İnformasiya Gününə həsr olunmuş konfrans keçirildi. Avropa Birliyinin TEMPUS proqramının Bakı ofisinin və ADU-nin təşkilatçılığı ilə keçirilən tədbirdə təhsil naziri Misir Mərdanov, ADU-nun rektoru, millət vəkili, professor Səməd Seyidov, təhsil nazirinin müavini Elmar Qasımov, Avropa Birliyinin Bakıdakı xüsusi nümayəndəsi səfir Rolan Kobia, Avropa Komissiyasının Təhsil və Mədəniyyət üzrə İcraçı Agentliyinin (Eacea) rəsmisi, TEMPUS proqramı üzrə məsul şəxs Franz Steidele, eləcə də ali təhsil müəssisələrinin nümayəndələri iştirak edirdilər. Tədbiri giriş sözü ilə açan professor Səməd Seyidov konfrans iştirakçılarını salamlayaraq TEMPUS proqramının təhsil sahəsində mühüm əhəmiyyət kəsb etdiyini bildirdi və ADU-nun Avropa ölkələrinin qabaqcıl universitetləri ilə yalnız TEMPUS proqramı çərçivəsində deyil, uzun illərdən bəri səmərəli əməkdaşlığa malik olduğunu qeyd etdi. S.Seyidov TEMPUS proqramı çərçivəsində Azərbaycandan olan universitetin Avropa Birliyi layihəsində ilk idarəçiliyi və Avropa universitetlərinin Azərbaycan tərəfindən ilk koordinasiyasını aparmasını Azərbaycan təhsilinin böyük uğuru kimi qiymətləndirdi. O, bu layihənin Azərbaycanın təhsil idarəçiliyində zəngin beynəlxalq təcrübə əldə edilməsinə və təhsil sahəsində islahatların daha da inkişafına təkan verəcəyinə əminliyini ifadə etdi. Bildirildi ki, layihənin büdcəsi 1 milyon 100 min avro təşkil edir.

Azərbaycan Respublikasının təhsil naziri Misir Mərdanov Avropa İttifaqının TEMPUS proqramında ölkəmizin iştirakından danışdı. TEMPUS proqramının fəaliyyət tarixinə toxunan təhsil naziri bildirdi ki, Azərbaycan bu proqrama 1995-ci ildən qoşulub və 22 layihədə iştirak edib. Misir Mərdanov ADU-nun TEMPUS proqramının layihə koordinatoru seçilməsini yüksək qiymətləndirdi. " İndiyədək həyata keçirilən 22 layihənin idarəçiliyini Avropa universitetləri həyata keçiriblər. ADU-nun layihənin koordinatoru seçilməsi Azərbaycan təhsilinin uğurudur. Bu, bir daha onu göstərir ki, Azərbaycan Dillər Universiteti Avropaya inteqrasiyada, eləcə də digər məsələlərdə ölkənin aparıcı ali təhsil ocağıdır". Təhsi naziri həyata keçirilən layihənin Azərbaycan təhsil sisteminin dünya təhsil sisteminə inteqrasiyasına təkan verəcəyini dedi. Misir Mərdanov Avropa İttifaqının Təhsil Komissarlığı ilə birbaşa təmasların qurulmasının vacibliyini də bildirdi.

Sonra çıxış edən Avropa İttifaqının Bakıdakı xüsusi nümayəndəsi səfir Rolan Kobia Azərbaycanla təmsil etdiyi qurumun əlaqələrindən söhbət açdı. Proqramın əhəmiyyətindən danışan R.Kobia Azərbaycanın bu layihədə iştirakını yüksək dəyərləndirdi. Onun sözlərinə görə, proqram Azərbaycan və Avropa təhsil müəssisələri arasında mövcud əlaqələrin daha da inkişaf etməsinə təkan verəcəkdir.

Tədbirdə Milli TEMPUS Ofisinin rəhbəri Pərviz Bağırovun "Azərbaycanda TEMPUS və Milli TEMPUS Ofisinin rolu" və "Avropa Birliyinin digər proqramlarında Azərbaycan universitetləri üçün imkanlar" mövzularında məruzələri dinlənildi.

2010-cu ildə TEMPUS IV-nün xüsusiyyətləri və III təkliflərin nəticələri, eləcə də "TEMPUS proqramına müraciət etmək üçün yeni elektron qaydaları" haqqında TEMPUS proqramı üzrə məsul şəxs, Avropa Komissiyasının Təhsil və Mədəniyyət üzrə İcraçı Agentliyinin (Eacea) rəsmisi Franz Steidele konfrans iştirakçılarına məlumat verdi.

ADU-nun Beynəlxalq əlaqələr üzrə prorektoru Jalə Qəribova isə çıxışında "Azərbaycan Dillər Universitetində TEMPUS layihələri"ndən danışdı. O bildirdi ki, layihə 3 il müddətində həyata keçiriləcəkdir. Prorektor Azərbaycan Respublikası Təhsil Nazirliyi, Naxçıvan Dövlət Universiteti, Gəncə Dövlət Universiteti, Lənkəran Dövlət Universiteti və Azərbaycan Müəllimlər İnstitutunun layihədə iştirak etdiklərini konfrans iştirakçılarının nəzərinə çatdırdı.

Konfrans dinlənilən məruzələr ətrafında müzakirələrlə yekunlaşdı.

Şakir CƏFƏROV

Azərbaycan müəllimi.- 2010.- 17 dekabr.- S.2.