"Açıq dərs"lər pedaqoji-metodik
baxımdan yüksək
qiymətləndirildi
Dekabrın 15-də Bakıdakı 42 nömrəli orta məktəbdə yeni təlim metodları və texnologiyaların tədrisə tətbiqi ilə bağlı "açıq dərs"lər keçirildi.
Biz dəvət olunmuş mütəxəssislərlə birlikdə əvvəlcə XI "D" sinfində həndəsə fənnindən "Konus və onun müstəvi kəsikləri" mövzusunda keçirilən "açıq dərs"də iştirak etdik.
Müəllim Afaq Bağırova ötən dərsi şagirdlərlə birlikdə
təkrar etdikdən sonra onların diqqətini proyektorların
vasitəsi ilə ekranda göstərilən
konusa oxşar dağlar, ağaclar, qədim abidələrə
baxmağa yönəltdi. Sinfin
şagirdləri qrup şəklində 3 komandaya
ayrılmışdı. "Silindir", "Konus"
və "Kürə"
adlı bu komandalara konusun düzbucaqlı üçbucağının
sahəsini tapmaq tapşırığı verildi.
Həmin tapşırıqlar
ayrı-ayrı şagirdlər
tərəfindən lövhədə
həll edildi. Cavablar yoxlanıldı. Hər komanda düzgün cavablara görə qiymətləndirildi.
Daha sonra "Tez və düz", "Heydər Əliyev zirvəsi" adlı mövzulara aid komandalara paylanmış məsələ və misallar həll edildi. Komandaların hər birində olan 6 şagirdin hamısı mövzuya aid sual və tapşırıqları cavablandırmaqda fəal iştirak etdi. Sonda komandaların topladığı ballar hesablandı. Onların tutduğu yerlər müəyyənləşdi. "Açıq dərs"i izləyən mütəxəssislər Afaq müəllimin apardığı bu dərsi və şagirdlərin fəallığını yüksək qiymətləndirdilər.
Sonra biz IX
"D" sinfində coğrafiya
fənnindən "Əhali"
mövzusu üzrə
keçirilən "açıq
dərs"də iştirak
etdik. Bu sinfin şagirdləri də 3 komandaya bölünmüşdü. Həmin
komandalar "Çinli",
"Hindli" və
"Azəri" adlandırılmışdı.
Müəllim Mirvari Əhədova hər 3 komandaya ayrı-ayrılıqda
"Əhalinin təbii
artımını necə
başa düşürsünüz?",
"Dünyada ən çox əhalisi olan ölkə hansıdır?", "Demoqrafik
siyasət nədir?",
"Demoqrafik partlayış
nə deməkdir?",
"Demoqrafik inqilab nə deməkdir?" suallarını verdi.
Komandaların əksər
üzvü suallara düzgün cavab verdi. Cavablar qiymətləndirilərək divardan
asılmış cədvələ
yazıldı.
Sonra müəllim komandalara miqrasiya haqqında tərtib olunmuş işlər payladı. Burada yazılmış "Qanunsuz
miqrasiya nədir?",
"Məcburi miqrasiyanı
necə başa düşürsünüz?" və s. suallara da şagirdlər düzgün cavab verdilər.
Elə həmin anda ekranda məcburi miqrasiyanı əks etdirən film nümayiş
etdirildi. Filmdə Qarabağdan, Ermənistandan
məcburi köçürülən
insanların acınacaqlı
həyatı göstərildi.
Bundan sonra isə müəllim komandalara belə bir sualla müraciət
etdi:
- Azərbaycanın 20 faiz torpaqları erməni təcavüzkarları
tərəfindən işğal
olunub. Siz bu torpaqların
qaytarılması üçün
nə təklif edərdiniz?
Hər üç
komanda üzvlərinin
suala cavabı eyni oldu:
- İşğal
olunmuş ərazimiz sülh yolu ilə qaytarılmalıdır. Əgər
bu mümkün olmasa, müharibə yolu ilə torpaqlarımızı
azad etməliyik!
Şagirdlərin cavabları fəal əməkdaşlığa görə
qiymətləndirildi.
Müəllim Mətanət Allahverdiyevanın
rus bölməsinin IV
"A" sinfindəki riyaziyyatdan
"açıq dərs"i
də maraqlı keçdi.
Həmin gün "açıq dərs"lər bitdikdən
sonra akt zalında tədbir keçirildi. Məktəbin direktoru Firəngiz
Həmidova çıxış
edərək "açıq
dərs"lərdə iştirak
etdikləri üçün
qonaqlara öz minnətdarlığını bildirdi.
Sonra çıxış
edən Bakı Pedaqoji Kadrların İxtisasartırma və Yenidənhazırlanma İnstitutunun
rektoru Asəf Zamanov dedi:
- Bu gün həqiqətən
mənim üçün
əlamətdar bir gün oldu. Ona görə ki, iştirak etdiyim "açıq dərs"lərin ikisini bizim institutda
kurs keçmiş müəllimlər aparırdı.
Birgə işləmək
həqiqətən öz
müsbət nəticəsini
verir. Axı dərsin keyfiyyəti müəllimdən asılıdır.
Doğrusu, bu "açıq dərs"lər o qədər
maraqlı keçdi ki, nöqsan axtarmağa lüzum qalmadı.
Asəf müəllim
çıxışının sonunda qarşıdan
gələn 2011-ci ildə müəllim və
şagirdlərə yeni-yeni uğurlar arzuladı.
"Açıq dərs"lərdə iştirak edən Bakı Şəhəri üzrə Təhsil İdarəsinin müdir müavini Məhəbbət Qarabağlı, həmin idarənin əməkdaşları Sitarə Məmmədova, Şəhla Kərimova, Həvva Dünyamalıyeva, Bakıdakı 14 nömrəli məktəbin direktoru Hürzad Verdiyeva öz çıxışlarında məktəbin I "Ç", V "Ç" və VI "A" siniflərində də keçən "açıq dərs"ləri yüksək qiymətləndirdilər. Eyni zamanda "açıq dərs"lərin pedaqoji-metodik baxımdan təhlil və dəyərləndirilməsi müəllim axtarışına, müəllim əməyinə verilən yüksək qiymət oldu.
Ədalət DAŞDƏMİRLİ
Azərbaycan
müəllimi.- 2010.- 17 dekabr.- S.4.