Uğur və zirvə ili

2010-cu il mənim həyatımda uğur və zirvə ili oldu! Həm bu ildə, həm də həyatım boyu əldə etdiyim bütün uğur və nailiyyətlərimə görə öncə valideynlərimə, müəllimlərimə və sonra da məni əhatə edən yaxşı insanlara çox minnətdaram. Pedaqoji fəaliyyətimə 1996-cı ildə Xətai rayonundakı 204 nömrəli orta məktəbdə biologiya müəllimi kimi başladım. Hazırda da bu məktəbdə çalışıram. 2008-2009-cu tədris ilində "Ən yaxşı müəllim" müsabiqəsinin qalibi oldum. Pedaqoji fəaliyyətimdə çox nailiyyətlərim olub, ancaq 2010-cu ildə mənim bu fəaliyyətlərimin sırasına yeniləri də əlavə olundu: Biologiya fənn proqramının müəlliflərindən biri oldum, Biologiya fənn kurikulumunun hazırlanması və dərsliklərin qiymətləndirilməsi işçi qrupunun üzvü, Azərbaycan Respublikası Təhsil Nazirliyi Təhsil Sektorunun İnkişafı üzrə İkinci Layihənin məsləhətçisi, Kurikulum Portalının veb-masteri. 2010-2011-ci tədris ilinin 10 və 11-ci siniflər üçün "Ümumi biologiya" dərsliyinin həmmüəllifi olmaq şərəfinə də nail oldum. Dəfələrlə müxtəlif yerli və xarici ölkələrin konfrans, seminar və "dəyirmi masa"larında iştirak edərək yenə də müxtəlif diplom və sertifikatlara layiq görüldüm. 2010-cu ildə Lomonosov adına Moskva Dövlət Universitetinin Moskva Pedaqoji Universiteti ilə birlikdə təşkil etdiyi uzaqdan təhsil yoluyla ixtisasartırma kursunu bitirdim.

Onu da qeyd edim ki, mənim həyatımda 2010-cu ilin ən yaddaqalan və ən önəmli hadisələrindən biri Beynəlxalq Müəllim Günü ərəfəsində Azərbaycan Respublikasının Prezidenti cənab İlham Əliyevin sərəncamı ilə ölkəmizdə təhsilin inkişafındakı xidmətlərinə görə bir qrup təhsil işçisinə verilən "Əməkdar müəllim" fəxri adı ilə təltif olunanların siyahısında mənim də adımın olması idi. Mən və mənim ailəm bu xəbəri eşitcək çox şad olduq. Anam və atam da bu sevincimə şərik olub, mənim üzərimdə çəkdikləri zəhmətlərinin hədər getmədiyini və mənimlə fəxr etdiklərini bildirdilər. Biz ailəvi olaraq bunu ölkə başçısının təhsilə, təhsil işçilərinə davamlı olaraq göstərdiyi diqqət və qayğının yeni nümunəsi kimi qarşılayıb, müəllim əməyinə verilən yüksək qiymət kimi dəyərləndiririk.

Əməyimə, çoxillik fəaliyyətimə verilən böyük dəyərə görə möhtərəm Prezidentimiz İlham Əliyevə, hər zaman dəstəyini, köməyini hiss etdiyim təhsil naziri Misir Mərdanova, Bakı Şəhəri üzrə Təhsil İdarəsinin müdiri Nailə Rzaquliyevaya, işlədiyim məktəbin dəyərli kollektivinə, direktorumuz Ziba Rzayevaya öz dərin minnətdarlığımı bildirirəm. Bu adın çox böyük məsuliyyəti var - bu adı layiqincə öz üzərində daşımaq məsuliyyəti! Mən bu məsuliyyəti öz üzərimdə hiss edir və bu adı daha uca və yüksək zirvədə saxlamaqdan ötrü bütün imkanlarımı səfərbər edərək təhsil islahatımızı nəinki respublikamızda, hətta xarici ölkələrdə də layiqincə təmsil edəcəyəm. Necə ki, bunu davamlı olaraq edirəm.

Bütün həmkarlarımı qarşıdan gələn yeni 2011-ci il münasibətilə ürəkdən təbrik edirəm. Əziz müəllimlər, qoy bu yeni ildə sizin ürəyinizdə olan yaşayıb-yaratmaq odu, öyrətmək eşqi heç vaxt sönməsin. Bir daha sizləri təbrik edir, sizlərə uzun ömür, cansağlığı və pedaqoji fəaliyyətinizdə yeni-yeni yaradıcılıq uğurları arzulayıram! Müəllim bir ziyadır! Elə həmin ziyadan bol-bol içən pöhrələr də bu gün qol-budaq atıb, onun xoşbəxt müəllim əməyinin bəhrəsini görən insan kimi şöhrət tapmasına səbəb olur! 2011-ci il həmişəki kimi UĞUR ilimiz olsun!

Almaz HƏSRƏT

Azərbaycan müəllimi.- 2010.- 31 dekabr.- S.13.