Sağlam cəmiyyətdə sağlam həyat tərzi

Ölkə Prezidenti İlham Əliyevin 28 iyun 2007-ci il tarixli Fərmanı ilə təsdiq edilmiş "Narkotik vasitələrin, psixotrop maddələrin və onların prekursorlarının dövriyyəsinə qarşı, narkomanlığın yayılması ilə mübarizə üzrə Proqramı"ndan irəli gələn vəzifələrin icrası ilə əlaqədar Azərbaycan Müəllimlər İnstitutu Tələbə Elmi Cəmiyyətinin xətti ilə "Narkotiklərə yox!" devizi altında narkomaniyaya qarşı profilaktik tədbirlər ayı elan olunmuş, dekabrda aylığa yekun vurulmuşdur. Tələbələr narkotik vasitələrin və psixotrop maddələrin zərəri, narkomaniya ilə mübarizə yolları haqqında məqalə və tezislərlə cəmiyyətdə sağlam həyat tərzini nə dərəcədə dəstəklədiklərini və qoruduqlarını tələbə elmi konfransında nümayiş etdirmişlər.

"Sağlam cəmiyyətdə sağlam həyat tərzi" mövzusunda konfransı giriş sözü ilə institutun rektoru, professor A.Naxçıvanlı açmışdır. Siyasi elmlər doktoru, millət vəkili A.Naxçıvanlı həm özünün ictimai-siyasi fəaliyyətində, həm də rəhbərlik etdiyi təhsil müəssisəsinin həyata keçirdiyi bütün tədbirlərdə gənc nəslin sağlamlığını, intellektual və fiziki inkişafını daim diqqət mərkəzində saxladığını qeyd etmişdir. Tələbələr arasında keçirilən sorğu əsasında onların elmə, idmana maraqlarının genişləndirilməsi üçün gənclərin ictimai fəallıqlarının artırılması vacibdir. Narkomaniyaya qarşı maarifləndirmənin roluna toxunulmuşdur.

Konfransın işində Azərbaycan Respublikası təhsil nazirinin müavini E.Qasımov, Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyası işçi qrupunun rəhbəri A.Əliquliyev, Bakı şəhər Narkoloji Dispanserin həkimi L.Cəfərova, Azərbaycan Dövlət İqtisad Universitetinin elmi işlər üzrə prorektoru, professor Ə.Bayramov, institutun Sumqayıt filialının tələbələri və professor -müəllim heyəti ilə yanaşı, ixtisasartırma fakültəsinin müdavimləri də iştirak etmişlər.

Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyası işçi qrupunun rəhbəri A.Əliquliyev narkomaniyaya qarşı mübarizədə ailə və cəmiyyətin hər bir üzvünün məsuliyyət daşıdığı, profilaktik iş apararkən narkotik asılılıqdan qurtarmanın əsas prinsipləri haqqında geniş məruzə etmişdir. Narkoloji dispanserin həkimi L.Cəfərovanın Azərbaycanda narkomanlığın törətdiyi fəsadlar - QİÇS, hepatit xəstəlikləri barədə statistik məlumatları, narkomaniyaya qarşı profilaktika qaydaları və abstensiya haqqında çıxışları konfrans iştirakçıları tərəfindən maraqla qarşılanmışdır.

Psixologiya elmləri doktoru, professor R.Əliyev narkomaniyanın inkişaf etməsi və formalaşmasının psixi və fiziki asılılıqlarını xarakterizə etmişdir.

İnstitutun tələbələrindən İ.Əsgərov, F.Bayramova, AMİ-nin Sumqayıt filialının tələbəsi N.Əsgərova çıxış edərək narkotik maddələr qəbulunun vurduğu bəlalardan danışdılar.

XX yüzilliyin ümumbəşəri bəlasına çevrilmiş, bu gün fiziki mənada insanların genefonduna sarsıdıcı zərbə vuran, qarşısıalınmaz çətinlik və xəstəliklər törədən narkomaniyanın konkret səbəbləri konfransın yekununda ümumiləşdirilmişdir.

Azərbaycan Dövlət İqtisad Universitetinin elmi işlər üzrə prorektoru, professor Ə.Bayramov konfransın gedişində tələbə - müəllim qarşılıqlı əməkdaşlığını ürəkdən bəyəndiyini bildirmiş, psixologiya üzrə fəlsəfə doktoru İ.Quliyevanın "Narkomaniya və sağlamlıq" mövzusunda təqdimatı konfrans iştirakçıları tərəfindən rəğbətlə qarşılanmışdır.

Konfransın işinə nazir müavini E.Qasımov çıxışı ilə yekun vurmuşdur.

Nazilə ABDULLAZADƏ

Azərbaycan müəllimi.- 2010.- 31 dekabr.- S.15.