"Ekologiya məktəblilərin
gözü ilə"
Bakıdakı 8 nömrəli orta ümumtəhsil
məktəbində "Ekologiya
ili"nə həsr olunmuş tədbir keçirildi. Tədbirin
təşkilatçısı ibtidai sinif müəllimi Mina Hüseynzadə iştirakçıları salamlayaraq onlara ölkə Prezidenti İlham Əliyevin sərəncamı
ilə elan olunan "Ekologiya ili"nin əhəmiyyəti
barədə
geniş məlumat verdi.
...Səhnədə
yaradılan Şirvanşahlar Sarayı kompleksinin təsviri
iştirakçılarda xoş ovqat yaratdı. Sonra
üçüncülərin
"Gəlin, təbiəti qoruyaq" mövzusuna həsr
etdikləri ədəbi-bədii kompozisiya nümayiş olundu. Şagirdlərin
ifasında Xəzər dənizi
ətrafında yaşayan türkdilli xalqların mədəniyyəti, incəsənəti,
tarixi, təbii sərvətləri xatırlandı,
tamaşalar, səhnəciklər
göstərildi,
mahnılar səsləndi və təbiətin gözəlliklərindən söz açıldı.
Müxtəlif
məqamlarda səslənən
muğam parçaları və ifa olunan "Lalələr"
rəqsi kompozisiyanı daha da rövnəqləndirdi. Sonda
direktor Aytən Baxşıyeva
kompozisiyanın hazırlanmasında əməyi olan
ibtidai sinif müəllimi Mina Hüseynzadəyə öz təşəkkürünü
bildirdi. Qeyd etdi ki, təhsil ocağında şagirdlərdə təbiətə
məhəbbət hissləri aşılayan tədbirlərin bundan sonra
keçirilməsi ənənəyə
çevriləcək.
***
Bakıdakı
38 nömrəli orta məktəbdə isə
"Ekologiya məktəblilərin gözü ilə" mövzusuna
həsr olunmuş "dəyirmi masa" keçirildi. Tədbir başlamazdan öncə foyedə təşkil olunan sərgi
iştirakçıları məmnun etdi. Məktəbin VII sinif şagirdi Münəvvər Kərimovanın ilmələrlə toxuduğu "Çin səddi" rəsmi maraq doğurdu.
Sonra kimya elmləri namizədi, Beynəlxalq ekologiya cəmiyyətinin
Azərbaycan üzrə inspektoru Aydın Əhmədzadə "Ekologiya nədir?"
mövzusunda geniş məruzə etdi, şagirdlərə
ekoloji biliklərə yiyələnməyin vacibliyini
vurğuladı. Şagirdlərdən Vəfa, Fidan, İlahə,
Ləman, Sürəyya, Nəzrin,
Elminə ekologiya ilə bağlı fikir mübadiləsinə qoşuldular. Gündüz
Abbasov və Yusif İbrahimov "Ekoloji pozuntular"ın
acı nəticələrindən bəhs edən slaydları
nümayiş etdirdilər.
Məktəbin
direktoru Yaşar Əliyev tədris ocağının ərazisində şagirdlərin yaxın köməkliyi ilə
müxtəlif ağac növlərinin və gül
kollarının əkilib və
becərildiyini bildirdi.
Beynəlxalq
Avrasiya Mətbuat Fondunun əməkdaşı Cəmilə Şahverdiyeva, direktor
müavini Gülnarə Vəliyeva, müəllimlər - Kəmalə
Məhərrəmova, Balaxanım
Cavadova, Ülfət Abbasova, Lalə İsmayılova və
Zenfira Qafarova diskussiya şəraitində
keçən "dəyirmi masa"da fəal iştirak etdilər.
Sifai SƏFƏROVA
Azərbaycan müəllimi.- 2010.-
31 dekabr.- S.21.