Təbiəti qoruyaq

Bakıdakı 27 nömrəli məktəbdə şagirdlərin təbiətə qayğı və diqqət ruhunda tərbiyəsinə xüsusi əhəmiyyət verilir. Təhsil ocağında ayrı-ayrı fənlərin tədrisi imkanlarından istifadə etməklə məktəblilərin ekoloji maariflənməsi, ekoloji biliklərə yiyələnmələri reallaşdırılır.

"Ekologiya ili" kimi tariximizə həkk olunan 2010-cu ildə məktəbdə həm də bir sıra tədbirlər təşkil olunmuşdur. Belə tədbirlərdən biri bu günlərdə idman zalında keçirildi. "Ekologiya ili"nə həsr olunmuş plakat, fotostendlərlə bəzədilmiş zalda şagird müstəqil işlərinin nəticələri olan referatlar da nümayiş etdirildi.

Tədbirin təşkilatçısı fiziki tərbiyə müəllimi Emil Qaybalıyev çıxışında ekoloji problemin qloballıq kəsb etdiyini vurğuladı, ekoloji duruma mənfi və müsbət təsir edən amillərdən danışdı.

Çıxış edən şagirdlər təbiətə qayğı, təbiət gözəlliklərinə diqqət məsələlərinə öz münasibətlərini bildirdilər.

Tədbiri məktəbin direktoru Cəmilə Ramazanova yekunlaşdıraraq ekoloji mövzunun əbədi və mühüm bir mövzu olduğunu qeyd etdi. Bizi əhatə edən ekoloji mühiti çirklənmədən qorumağın vətəndaşlıq borcu olduğunu söylədi. Sonra o, tədbirin təşkilatçı və iştirakçılarına məktəb rəhbərliyi adından təşəkkürünü bildirdi.

Azərbaycan müəllimi.- 2010.- 31 dekabr.- S.21.