Ötən il 500 məktəb İnternetə qoşulub

Hazırda respublikamızın ümumtəhsil məktəblərində hər 20 şagirdə 1 kompüter düşür. 5 il bundan əvvəl isə bu 1:1063 nisbətində idi. Təhsil Nazirliyindən aldığımız məlumata görə, Dövlət Proqramı çərçivəsində ölkənin bütün ümumtəhsil məktəbləri İKT ilə tam təmin edilmişdir.

Bundan başqa, 500 təhsil müəssisəsi Azərbaycan Təhsil Şəbəkəsinə (İntranet) və İnternet şəbəkəsinə qoşulmuşdur. Təhsil ocaqlarının inzibati, pedaqoji və texniki heyəti əhatə olunan 40 min nəfər müvafiq treninqlərdən keçərək, İKT bacarıqlarına yiyələnmişlər. 20 məktəb isə "Elektron məktəb" layihəsinə qoşulmuş, ayrı-ayrı fənlər üzrə elektron tədris vasitələri məktəblərə çatdırılmışdır. Mingəçevir, Şəki, Masallı, Qazax, Sabirabad rayon ümumtəhsil məktəbləri 226 dəst personal kompüterlə təchiz edilmişdir. "Xalq kompüteri" layihəsi çərçivəsində 5000 müəllim kompüterlə təmin olunmuşdur. 2010-cu il ərzində "İntel" şirkəti tərəfindən 1000, Təhsil Nazirliyi tərəfindən isə 3000 olmaqla, ümumilikdə 4000 şagirdə noutbuklar veriləcək.

Bundan başqa, 25 min ali və orta təhsil müəssisələrinin pedaqoji, 4000 nəfər inzibati idarəetmə və 500 nəfər texniki heyəti İKT üzrə treninqlərdən keçəcək.

M.NOVRUZOV

Azərbaycan müəllimi.-2010.-19 fevral.-S.1.