Ümummilli lider Heydər Əliyevin
anadan olmasının 87-ci ildönümü münasibətilə təhsil müəssisələrində
keçiriləcək tədbirlər haqqında
Azərbaycan Respublikası təhsil nazirinin əmri
2010-cu il mayın 10-da
müstəqil Azərbaycanın qurucusu, dünya azərbaycanlılarının
iftixarı, müdrik siyasətçi və dövlət
xadimi Heydər Əliyevin anadan olmasının 87-ci
ildönümü tamam olur.
Ulu öndər Heydər
Əliyevin qazandığı şöhrət hüdudsuzdur,
onun nüfuzu heç bir sərhəd tanımır. Beynəlxalq
aləmdə dahi siyasətçi və nadir şəxsiyyət
kimi qəbul edilən bu böyük insan hər bir azərbaycanlının
qəlbində öz əzəmətli heykəlini
ucaltmışdır.
Azərbaycançılıq
ideologiyasının banisi və ilhamvericisi olan ümummilli
lider Heydər Əliyev həyat və fəaliyyəti,
xalqına və Vətəninə misilsiz xidməti ilə nəsillərə
nümunədir. Müstəqil Azərbaycanın təhsil sahəsində
dövlət siyasətinin müəyyən olunması, təhsil
sisteminin uğurlu inkişaf yoluna qədəm qoyması da məhz
ulu öndərin adı ilə bağlıdır. Onun zəngin
irsinin gənc nəslə dərindən öyrədilməsi,
Azərbaycanın gələcək qurucularının
böyük şəxsiyyət Heydər Əliyevin nümunəsində
tərbiyə olunması ölkənin təhsil orqanları və
pedaqoji kollektivlərinin ən ümdə vəzifə borcu
kimi qəbul edilməlidir.
Qeyd olunanları tarixi zərurət
kimi nəzərə alaraq
ƏMR EDİRƏM:
1. Naxçıvan MR Təhsil
Nazirliyi, Bakı Şəhəri üzrə Təhsil İdarəsi,
Gəncə Şəhər Təhsil İdarəsi, rayon
(şəhər) təhsil şöbələri, texniki
peşə, ali və orta ixtisas təhsili müəssisələrinin,
bilavasitə Təhsil Nazirliyi nəzdindəki ümumi təhsil
müəssisələrinin rəhbərləri 2010-cu il mart
ayından başlayaraq ümummilli lider Heydər Əliyevin
anadan olmasının 87-ci ildönümü münasibətilə
xüsusi tədbirlər müəyyənləşdirib həyata
keçirilməsini təmin etsinlər.
2.
Respublikanın ümumtəhsil məktəblərinin VII-XI
sinif şagirdlərinin və ilk peşə ixtisas təhsili
müəssisələri şagirdlərinin iştirakı ilə
ulu öndər Heydər Əliyevin həyat və fəaliyyətinə
həsr olunmuş inşa yazı müsabiqəsi
keçirilsin. Müsabiqənin məktəb və rayon (şəhər)
mərhələləri aprel ayının 10-dək
yekunlaşdırılsın.
3.
İnşa müsabiqəsinin yekun mərhələsi Təhsil
Nazirliyinin müəyyən etdiyi vaxtda Bakı şəhərində
keçirilsin.
4.
Müsabiqənin yekun mərhələsinin
iştirakçıları üçün
aşağıdakı qaydada kvota müəyyənləşdirilsin:
4.1. Ümumtəhsil məktəbləri
üzrə - hər rayon və
şəhərdən 1 (bir) nəfər
4.2. Bilavasitə Təhsil
Nazirliyinin nəzdindəki ümumi təhsil müəssisələri
üzrə - 5 (beş) nəfər
4.3. İlk peşə
ixtisas təhsili müəssisələri üzrə - 10 (on)
nəfər
5.
İlk peşə ixtisas təhsili müəssisələri və
bilavasitə Təhsil Nazirliyinin nəzdindəki ümumi təhsil
müəssisələri şagirdlərinin inşa
yazılarının nəzərdən keçirilərək
yekun mərhələdə iştirak üçün qaliblərin
müəyyənləşdirilməsi işinin təşkili
Təhsil Nazirliyi Aparatının rəhbəri İ.Pirməmmədova
həvalə olunsun.
6.
Şəhərlər və kənd rayonları üzrə
ümumi təhsil şöbələri (A.Muradov, A.Əhmədov)
inşa yazı müsabiqəsinin yekun mərhələsinin səmərəli
təşkili, başa çatdırılması, qaliblərin
müəyyənləşdirilməsi məqsədilə
lazımi tədbirlər görsünlər, ən
yaxşı inşaların toplu şəklində nəşr
olunması ilə bağlı İqtisadiyyat şöbəsi
(Ş.Əliyev) və Dərslik və nəşriyyat
şöbəsi (F.Şahbazlı) ilə birgə təkliflər
hazırlasınlar.
7.
Ali və orta-ixtisas təhsili şöbəsi
(İ.Mustafayev), Elm şöbəsi (G.Hüseynova) 2010-cu ilin martından etibarən ali
və orta-ixtisas təhsili müəssisələrinin rəhbərləri
ilə birlikdə ümummilli lider Heydər Əliyevin elm, təhsil
və iqtisadiyyatın inkişafı sahəsində
genişmiqyaslı fəaliyyətinə həsr olunmuş
elmi-praktik konfrans, "dəyirmi masa" və seminarların
keçirilməsi ilə bağlı lazımi tədbirlər
görsünlər.
8.
Tərbiyə və məktəbdənkənar müəssisələrlə
iş şöbəsi (A.İbrahimov) 2010-cu ilin mart-aprel
aylarında ümumtəhsil məktəbləri şagirdlərinin
iştirakı ilə "Heydər Əliyev və müstəqil
Azərbaycan" mövzusunda rəsm müsabiqəsi və sərgisinin,
şahmat və futbol turnirlərinin keçirilməsini təmin
etsin.
9.
İctimaiyyətlə əlaqə şöbəsi
(B.Hüseynzadə) əmrin "Azərbaycan müəllimi"
qəzetində və "Təhsil xəbərləri" məcmuəsində
dərc olunmasını təmin etsin.
10.
Əmrin icrasına nəzarəti öz üzərimə
götürürəm.
Misir MƏRDANOV,
Azərbaycan Respublikasının təhsil naziri,
15 fevral 2010-cu il
Azərbaycan müəllimi.-2010.-19 fevral.-S.2.