Təlim kurslarının 2-ci mərhələsini başa vurmuş müəllimlərə sertifikatlar verildi

Fevralın 12-də Azərbaycan Müəllimlər İnstitutunda "Təhsilin əsasları" fənninin tədrisi üzrə müəllimlərin cəlb olunduğu treninqlərin ikinci mərhələsinin başa çatmasına dair "dəyirmi masa" keçirildi.

Tədbirdə Təhsil Nazirliyinin nümayəndələri, Azərbaycan Dövlət Pedaqoji Universitetinin, Gəncə Dövlət Universitetinin, Azərbaycan Müəllimlər İnstitutunun və onun filiallarının müəllimləri iştirak edirdilər.

Tədbiri giriş sözü ilə açan AMİ-nin rektoru, professor Aqiyə Naxçıvanlı hazırda üç ali məktəbdə "Təhsilin əsasları" fənninin tədrisi ilə əlaqədar məlumat verdi və ali məktəblərdə bu fənni tədris edən müəllimlər üçün institutda təşkil olunan treninqlərdən danışdı.

Təhsil naziri Misir Mərdanov AMİ-də "Təhsilin əsasları" fənninin tədrisi ilə əlaqədar keçirilən treninqlərin yüksək səviyyədə təşkilindən razı qaldığını qeyd etdi və bu fənnin tədrisinə ayrılan saatlar barədə fikirlərini bildirdi. Müvafiq tədris vəsaitinin çapa hazırlanmasını məqbul hesab edən nazir Azərbaycan Müəllimlər İnstitutunda "Təhsilin əsasları" fənninin tədrisinə dair yeni bir mərkəzin yaradılması təklifini irəli sürdü və bu işlərin həyata keçirilməsində maddi-texniki cəhətdən çətinliklər olarsa, Təhsil Nazirliyi tərəfindən kömək göstəriləcəyini vurğuladı.

Misir Mərdanov müəllimlər tərəfindən "Təhsilin əsasları" fənninin tədrisi metodikasına dair məqalələrin hazırlanıb "Azərbaycan müəllimi" qəzetində dərc olunmasını da tövsiyə etdi.

Tədbirdə "Təhsilin əsasları" fənnini tədris edən müəllimlər müzakirə olunan məsələ ilə bağlı fikirlərini bildirdilər. Qeyd etdilər ki, "Təhsilin əsasları" fənninin tədrisi əvvəlki dərs prosesindən xeyli fərqlidir. Belə ki, bu fənnin interaktiv tədrisində dərs prosesinin idarə edilməsi hər bir müəllimin özündən asılıdır.

Sonda təhsil naziri Misir Mərdanov tərəfindən "Təhsilin əsasları" fənninin tədrisinə dair təşkil olunmuş təlim kurslarının 2-ci mərhələsini başa vurmuş müəllimlərə sertifikatlar təqdim olundu.

Şakir CƏFƏROV

Azərbaycan müəllimi.-2010.-19 fevral.-S.2.