Muğam ustadları ilə
görüş
Bülbül
adına Bakı orta ixtisas musiqi məktəbində muğam
ustadları Əlibaba Məmmədovun 80, Ağaxan Abdullayevin
isə 60 illik yubileyləri münasibətilə tədbir
keçirilmişdir.
Tədbiri giriş
sözü ilə məktəbin direktoru Nigar Əsgərova
açaraq qonaqları salamladıqdan sonra sözü Azərbaycan
Milli Elmlər Akademiyasının akademiki Vasim Məmmədəliyevə
verdi. Akademik yubilyar sənətkarların
yaradıcılıq məziyyətlərindən
danışaraq qeyd etdi ki, onların hər birinin Azərbaycanın
muğam sənətinin inkişafında, xalq musiqisinin zənginləşməsində,
muğam sənətinin tədrisində zəhmətləri
çox böyükdür. Məhz elə buna görə də
Azərbaycan Respublikasının Prezidenti İlham Əliyev
xalq artistləri Əlibaba Məmmədovu "İstiqlal"
ordeni, Ağaxan Abdullayevi isə "Şöhrət" ordeni
ilə təltif etmişdir. Bu, musiqi sənətinə, Azərbaycan
ifaçılığına verilən mükafatdır.
İndi muğamlarımız artıq beynəlxalq status
qazanıb. Bu işdə Azərbaycan muğamını
dünyada tanıdan Heydər Əliyev Fondunun prezidenti Mehriban
xanım Əliyevanın zəhməti çox böyükdür.
Məhz onun təşəbbüsü ilə Bakıda
"Muğam evi" inşa olunmuş, muğamlarımız
YUNESKO-nun qeyri-maddi mədəni irsi kimi qəbul olunmuşdur.
Tədbirdə çıxış edən təhsil naziri Misir Mərdanov qonaqları salamlayaraq bu tədbirdə iştirak etməkdən məmnunluğunu bildirdi. Daha sonra nazir qeyd etdi ki, yubileylərini qeyd etdiyimiz Əlibaba Məmmədov və Ağaxan Abdullayev bizim təhsil müəssisələrinin müəllimləridir və onların yaxşı işləri xalq tərəfindən həmişə yüksək qiymətləndirilir.
Əlibaba Məmmədovu Azərbaycanda, Şərqdə və müsəlman aləmində hamı tanıyır, sevir. Əlibaba müəllim sənətini dərindən bilən, onun fövqündə duran bir insandır. Gözəl xanəndə olduğu kimi, gözəl də müəllimdir. Sənətinin mahir bilicisidir, aydın diksiyaya malikdir. Bütün bu xüsusiyyətlər onun xalq tərəfindən sevilməsinə səbəb olmuşdur.
Daha sonra 30 ildən çox Əlibaba Məmmədovu tanıdığını bildirən nazir qeyd etdi ki, görkəmli sənətkarla bu gün də sıx əlaqə saxlayır, onu fəaliyyətini daim izləyir və sənəti ilə fəxr edir.
Nazir bu iki böyük sənətkara dövlət başçısı İlham Əliyev tərəfindan mükafatlar verilməsini bütövlükdə Azərbaycan musiqisinə verilən qiymət kimi dəyərləndirdi.
Çıxışının sonunda nazir hər iki yubilyarı ürəkdən təbrik edərək onlara hədiyyələr təqdim etdi.
Tədbirdə bəstəkar Azər Rzayev, xalq artisti Arif Babayev, əməkdar incəsənət xadimi Arif Qazıyev, Azərbaycan Milli Konservatoriyası nəzdində Musiqi Kollecinin direktoru, professor Nazim Kazımov, millət vəkili Ziyad Səmədzadə, Xəzər Universitetinin rektoru, professor Hamlet İsaxanlı, BDU-nun müəllimi Əsmətxanım Məmmədova və başqaları çıxış edərək yubilyarlar haqqında ürək sözlərini söylədilər.
Gənc muğam
ustalarının ifa etdikləri muğamlar məclisi daha da
rövnəqləndirdi.
Malik NOVRUZOV
Azərbaycan
müəllimi.-2010.-26 fevral.-S.3.