Ölkə məktəblərində "son zəng"
çalındı
Bu il orta ümumtəhsil məktəblərinin 104037
şagirdi məzun oldu.
"Son zəng" həyatda
bir dəfə olan və bütün ömür boyu xoş
hisslərlə xatırlanan hadisələrdəndir.
Bakıdakı İltifat Hacıyev adına "Tərəqqi"
texniki-humanitar təmayüllü liseydə builki məzunlar
üçün keçirilən "Son zəng" tədbirini
isə nəinki bu təhsil ocağını başa vuran 73 gənc,
həm də mərasimin digər iştirakçıları,
yəqin ki, heç vaxt unutmayacaqlar.
Liseyin rəhbərliyi, 3
onbirinci sinfin məzun olacaq şagirdləri, onların sinif rəhbərləri
bu ənənəvi tədbiri əvvəlki ildəkilərdən
fərqli, olduqca zəngin məzmun və orijinal formada
hazırlamışdılar. 3 onbirinci sinfin hər birinin
ayrıca xüsusi bayram forması və məzun lentləri
vardı. Hər biri "Son zəng"ə öz təqdimatını
- mahnı, rəqs, şeir, yumorlu səhnəciklərlə
dolu proqramını hazırlamışdı.
Mərasim musiqi sədaları
altında onbirincilərin tədbirin keçirildiyi yerə - məktəbin
bayramsayağı bəzədilmiş geniş həyətindəki
meydançaya daxil olması ilə başlandı. Tədbiri
açan aparıcılar mərasim
iştirakçılarını salamlayıb, onbirinciləri
məzun olmaları münasibəti ilə təbrik etdilər.
Dövlət himni ifa olundu, Azərbaycan bayrağı
qaldırıldı. Onbirincilər öz yoldaşlarından
birinin - dərs ilinin başa çatmasına bir neçə
ay qalmış dünyasını dəyişmiş Şəhriyar
Eyvazovun xatirəsini bir dəqiqəlik sükutla yad etdilər.
Onsuz da kövrək hisslər üstündə köklənən
tədbirə bu hadisə bir az da kövrəklik qatdı.
V sinif şagirdləri
"Azərbaycanım" mahnısını ifa etdilər.
XI-lər "Yallı" getdilər. Aparıcılar ölkəmizdə
son illər təhsilin inkişafı yönündə
görülən işlərdən, əldə olunan
uğurlardan, ümummilli liderimiz Heydər Əliyevin təhsilə,
gənclərə göstərdiyi diqqət və
qayğısından, həmin siyasəti bu gün ölkə
Prezidenti cənab İlham Əliyevin uğurla davam etdirməsindən,
təhsilimizdə aparılan inkişafyönlü işlərdə
Heydər Əliyev Fondunun, onun prezidenti, ölkənin birinci
xanımı, millət vəkili Mehriban Əliyevanın
yaxından iştirakından söz açdılar, ölkə
təhsilində baş verən inkişaf fonunda liseylərinin
də tərəqqi etdiyini vurğuladılar.
Sonra onbirincilərə təbriklər
ünvanlandı. Məzunları öncə liseyin direktoru Məhbubə
Məmmədova təbrik edib, onlara ən xoş
arzularını bildirdi. Tövsiyə etdi ki, heç vaxt liseylərini, müəllimlərini
yaddan çıxarmasınlar, onlarla daim əlaqə
saxlasınlar, liseyin və onun əvvəlki illərinin məzunlarının
ənənələrini davam etdirsinlər.
M.Məmmədova təbrik
çıxışında başa çatmaqda olan dərs
ilində liseylərinin əldə etdiyi uğurlara, onların
qazanılmasında məzunluq astanasında olan XI sinif
şagirdlərinin roluna da toxundu. Qeyd etdi ki, lisey son illər
xeyli inkişaf edib. Hazırda o, ölkədə "Elektron məktəb"
layihəsinə qoşulmuş 20 ümumtəhsil müəssisəsindən
biridir. Liseyin 10 sinfində proyektorla kompüterlər
quraşdırılıb. Bildirdi ki, tədris müəssisəsi
Türkiyənin Samsun şəhərindəki məktəblərlə
"Qardaşlaşmış məktəblər" layihəsinə
qoşulub. May ayında liseyin direktoru, 4 müəllimi və 7
şagirdi həmin layihə çərçivəsində
Direktor M.Məmmədova qeyd
etdi ki, liseyin V "A" (Azərbaycan
bölməsi) və V "A" (rus bölməsi) siniflərində
eksperimental olaraq yapon dilinin tədrisinə başlanıb.
Bununla əlaqədar Yaponiyanın ölkəmizdəki səfirliyi
və Yaponiya Mədəniyyət Fondu ilə əlaqələr
yaradılıb. Yaponiya səfiri ilə V sinif şagirdlərinin
görüşü keçirilib.
Liseyin digər
uğurlarından da söz açan M.Məmmədova IX sinif
şagirdi Nərmin Məmmədovanın, XI sinif şagirdi Mənsumə
Nuriyevanın bu il ölkə üzrə fənn
olimpiadalarının son turunda Azərbaycan dili və ədəbiyyat
fənnindən II və III yerləri tutduqlarını, XI
sinif şagirdi Elçin Salahovun respublika üzrə riyazi məntiq
olimpiadasında 50 ən yaxşı şagird sırasına
düşdüyünü və final turuna vəsiqə
qazandığını, ulu öndər Heydər Əliyevin
anadan olmasının 87-ci ildönümü ilə əlaqədar
keçirilmiş müsabiqədə IX "A" sinif
şagirdi Fəridə Əfəndizadənin qaliblər
sırasına çıxdığını, ibtidai sinif
şagirdlərindən 7 nəfərin şahmat turnirində
III yeri tutduğunu diqqətə çatdırdı.
Sonra dərs ili boyu qazandığı
uğurları və təlim-tərbiyə sahəsində
yüksək göstəriciləri ilə fərqlənmiş
şagirdlərə və müəllimlərə
mükafatlar - Fəxri fərmanlar və diplomlar təqdim
olundu.
Liseyin Azərbaycan dili və
ədəbiyyat müəllimi Gülbuta Abıyeva, tarix müəllimi
Qənirə Yaqubova, buraxılış siniflərinin rəhbərləri
Təranə Aslanova, Sevda Məhsəliyeva, Təranə
Abbasova, direktor müavinləri Sədaqət Nağıyeva,
Afət Əsədova, Mehriban Salahova da öz yetirmələrini
məzun olmaları münasibəti ilə səmimi-qəlbdən
təbrik edib, onların valideynlərinə
gözaydınlığı verdilər, məzunlara müstəqil
həyatlarında uğurlar arzuladılar.
Sonra onbirinci siniflər
hazırladıqları maraqlı proqramı növbə ilə
təqdim etdilər. Çıxış edən məzunlar
yaşadıqları 11 illik maraqlı məktəb həyatına,
əldə etdikləri bilik və bacarıqlara, hər zaman
görüb duyduqları isti münasibətə görə
liseyin direktoru Məhbubə Məmmədovaya,
bütövlükdə müəllim kollektivinə və onun
ayrı-ayrı üzvlərinə minnətdarlıqlarını
bildirib, barələrində xoş sözlər dedilər.
Mərasimin ən maraqlı
və sevindirici anlarından biri XI "A" sinfinin rəhbəri
Təranə Aslanovanın yetirmələrindən 3-nün
artıq imtahan verərək qardaş Türkiyənin ən
nüfuzlu ali məktəblərinə qəbul olunmaları
barədə məlumat verməsi oldu. Mərasim
iştirakçıları tələbə adını
qazanmış Əmrah Abbasovu, Toğrul Abbaslını və
Murad Qurbanovu alqışlarla qarşıladılar. Direktor M.Məmmədova
yüksək uğura imza atmış hər üç məzunu
təbrik etdi.
Birinci sinif şagirdləri
meydana daxil olub, onbirincilərə öz təbriklərini
şeirlər, mahnılarla çatdırdılar.
Nəhayət, mərasimin ən
kövrək və həyəcanlı anı gəlib
çatdı. Dərs ilinin başa
çatdığını, onbirinci sinif şagirdlərinin məzun
olduğunu bildirən "son zəng" çalındı.
Mərasim iştirakçılarının alqış sədaları
altında onuncular liseyin rəmzi açarını onbirincilərdən
qəbul etdilər. "Məktəb illəri"nin həzin,
kövrək hisslər doğuran melodiyası ətrafa
yayıldı...
Yusif ƏLİYEV
Azərbaycan müəllimi.- 2010.- 4 iyun.- S.1.