O, yaşıdları arasında ən güclü şahmatçı kimi tanınır

Masallı rayonunda fəaliyyət göstərən Uşaq-Gənclər Şahmat Məktəbinin uğurlarından danışarkən məktəbin yetirməsi Sücaət Orucovu xususi qeyd etmək lazımdır. O, Respublika Şahmat Mərkəzində bu il martın 22-dən aprelin 2-dək yeniyetmələr arasında keçirilən ölkə birinciliyində ən yüksək nəticə göstərərək çempion adına layiq görülüb. Hazırda idman ustalığına namizəd olan bu yeniyetmə 2 dəfə Azərbaycan Şahmat Olimpiadasının qalibi, 3 dəfə "Prezident kuboku"nun mükafatçısı, dəfələrlə respublika turnirlərinin qalibi, 2007-ci ilin gümüş medalçısı, I Beynəlxalq Şahmat Festivalının - "Gəncə-Open"in qalibi, 2007-ci ildə Yunanıstanda keçirilmiş məktəblilərin dünya birinciliyində 2-ci yerin sahibi, "Bakı-Open" turnirinin və digər yarışların mükafatçısıdır.

Bu gün Sücaət Orucov 16 yaşlılar arasında Azərbaycanın ən güclü şahmatçısı kimi tanınır. O, iyun ayında Avropa birinciliyində və oktyabrda Yunanıstanda keçiriləcək dünya birinciliyində ölkəmizi təmsil edəcək. Eyni zamanda avqustda Türkiyədə keçiriləcək dünya olimpiadasında da nəyə qadir olduğunu bir daha göstərəcək.

Biz həmin yarışlarda daha böyük qələbə qazanmaq üçün gənc idmançıya uğurlar diləyirik.

Şakir CƏFƏROV

Azərbaycan müəllimi.- 2010.- 4 iyun.- S.8.