Rəsul Rzanın 100 illik yubileyinə həsr olunan tədbir

İyunun 4-də Azərbaycan Müəllimlər İnstitutunda "Rəsul Rzanın 100 illik yubileyinin keçirilməsi haqqında" Azərbaycan Respublikası Prezidentinin 14 yanvar 2010-cu il tarixli 681 nömrəli sərəncamının icrası ilə bağlı tədbir keçirildi.

Tədbirdə AMİ-nin professor-müəllim heyəti, tələbələr, Azərbaycan Yazıçılar Birliyi İdarə heyətinin üzvü Q.Nəcəfzadə, Yazıçılar Birliyinin üzvü, Rəsul Rzaya həsr olunmuş yubileylərin keçirilməsi ilə əlaqədar komissiyanın üzvü, şair Dayandur iştirak edirdi.

Tədbiri giriş sözü ilə açan institutun rektoru, professor Aqiyə Naxçıvanlı mürəkkəb və çoxşaxəli yaradıcılıq yolu keçmiş Rəsul Rzanın poeziyaya gəlişindən danışdı. O, xalq şairi Rəsul Rzanın yarım əsrdən çox bir müddət ərzində axtarışlar apararaq yeni tipli, tamamilə müasir, epik, novator poeziyanı yaratması və bir növ, yüzilliyin poeziyasına yekun vurması ilə Azərbaycan ədəbiyyatında misilsiz iz qoyduğunu qeyd etdi.

Tədbirdə Rəsul Rzanın həyat və yaradıcılığı, pedaqoji görüşləri haqqında institutun dosentləri V.Qurbanov, B.Həsənli, "Xalq şairi Rəsul Rza yaradıcılığından nələri öyrənmişik" mövzusunda Pedaqogika və filologiya fakültəsinin IV kurs tələbəsi Şəfəq Məmmədova çıxış etdilər. Çıxışlar arasında AMİ-nin özfəaliyyət kollektivinin tələbələri Rəsul Rzanın şeirlərini və sözlərinə yazılmış mahnıları səsləndirdilər.

Tədbirin sonunda qonaqlar da xalq şairi Rəsul Rzanın yaradıcılığına öz münasibətlərini bildirdilər və şairin yubileyinin yüksək səviyyədə keçirilməsinə görə institutun rektoru Aqiyə Naxçıvanlıya və institutun bütün kollektivinə minnətdarlıqlarını bildirdilər.

Nabat OSMANOVA

Azərbaycan müəllimi.- 2010.- 18 iyun.- S.8.