"Ədəbiyyat dərslərində
yeni texnologiyalar: fəal/interaktiv təlim"
Dünya təhsilinə inteqrasiya olunan bir zamanda,
başqa fənn müəllimləri kimi, ədəbiyyat müəllimi
də öz fəaliyyətində dönüş
yaratmalı, daha səmərəli metod, priyom, vasitələr tapmalıdır. Bunun ən optimal yolu
yeni texnologiyalardan istifadədir. Qloballaşan
təhsil əsrində
bəlli olur ki, müəllim mütləq mənada yeganə bilik mənbəyi deyil; şagird subyektdir; ənənəvi təlimin
faydalı tərəfləri
yeni yanaşmalarla uzlaşdırılmalıdır... Bu istiqamətdə görüləsi işlərin
elmi-metodik şərhini
əks etdirən vəsaitə müəllimlərin
böyük ehtiyacı
vardır.
Orta məktəbdə
çalışanların ehtiyacını ödəmək
baxımından Azərbaycan
Dövlət Pedaqoji Universitetinin dosenti Soltan Hüseynoğlunun
"Ədəbiyyat dərslərində
yeni texnologiyalar: fəal/interaktiv təlim" (Bakı.
2009, 200 s.) müəllim üçün
vəsaiti vaxtında çap olunmuş zəngin informasiyalı, orijinal təhlil və şərh üslubunda yazılmış
dəyərli bir əsərdir.
Azərbaycan Respublikası
Təhsil Nazirliyinin 24
noyabr 2009-cu il tarixli 1327 nömrəli əmri ilə müəllim üçün
metodik vəsait kimi təsdiq olunmuş kitabın elmi redaktoru, Azərbaycan Respublikası
Təhsil Nazirliyinin şöbə müdiri, əməkdar müəllim
Aydın Əhmədov,
rəyçilər Təhsil
Nazirliyinin şöbə
müdiri, filologiya elmləri namizədi, dosent Faiq Şahbazlı,
TPİ-nin direktor müavini, Kurikulum Mərkəzinin direktoru, dosent Ənvər Abbasovdur.
"Redaktordan" başlığı
altında verilmiş hissədə islahata başlanan vaxtdan təhsildəki uğurlar
və problemlər ümumiləşdirilmiş, fəal/interaktiv dərsin məzmun və quruluşundakı fərqlər
vurğulanmışdır.
Dosent S.Hüseynoğlu
kitabdakı yeganə fəsli belə adlandırıb: "Fəal/interaktiv təlim: mahiyyəti və tətbiqi yolları". Mövcud pedaqoji-psixoloji ədəbiyyata,
metodik tövsiyələrə
əsaslanan müəllif
bir çap vərəqi yarım hissədə (paraqrafda) fəal/interaktiv təlimin mahiyyətini təsvir, şərh etmiş, mübahisəli və polemika doğuran məsələlərə
aydınlıq gətirmişdir.
Problem vəziyyətin yaradılması;
dialoq və əməkdaşlığın zəruriliyi; şagird-tədqiqatçı,
müəllim-bələdçi; psixoloji dəstək: hörmət və etibar kimi mövzuların
şərhi öyrədicidir.
Bu baxımdan fəal dərsin mərhələləri
ilə bağlı metodik şərhlər, mövcud mənbələrdəki
fikirlərin təhlili
kitabın elmi-praktik dəyərini təşkil
edən tərəflərdəndir.
Ənənəvi təlim və fəal/interaktiv təlim arasında fərqlərin açıqlanması,
fəal/interaktiv dərsin başlıca xüsusiyyətləri və
təşkili məsələləri
haqqında müəllimlərin
metodik tövsiyələrə,
nümunə dərslərinə
böyük ehtiyac var.
Əsərin ikinci paraqrafında müəllif fəal/interaktiv dərsin başlıca xüsusiyyətləri
və təşkili məsələlərinə aydınlıq
gətirmişdir.
Müəllimlərin ehtiyacını
nəzərə alan dosent S.Hüseynoğlu fəal/interaktiv təlimin tətbiqi yollarını tərcümeyi-hal materiallarının
öyrədilməsi, epik,
lirik və dramatik əsərlərin,
icmal materialların tədrisi nümunələrində
çox orijinal bir məzmunda işləmişdir.
Oxucu-müəllimlə canlı söhbət təsiri bağışlayan
metodik vəsaitin sonluğu - "Nəticə
əvəzi" zəngin
məktəb təcrübəsi
əsasında işlənmiş
əsərin metodik epiloqu təsiri bağışlayır. Azərbaycan təhsilinin
tarixi ənənələrinə
söykənməklə müəllimin
çağdaş dövrün
dəyərlərindən istifadə
edərək daha böyük nailiyyətlər
qazanacağına dərin
inam sonluğun sosial-pedaqoji dəyərini
təmin edir.
Şamxəlil MƏMMƏDOV,
pedaqoji elmlər üzrə
fəlsəfə doktoru,
Elman ƏBDÜLOV,
ADPU-nun dissertantı
Azərbaycan müəllimi.-
2010.- 25 iyun.- S.12.