Yeniyetmə rəssamlarımız beynəlxalq müsabiqələrdə uğur qazanırlar

Paytaxtın Nizami rayonundakı Uşaq-Gənclər Yaradıcılıq Mərkəzində fəaliyyət göstərən dərnəklərin üzvləri şəhər, respublika əhəmiyyətli tədbirlərdə, beynəlxalq müsabiqə, sərgi və festivallarda da fəal iştirak edirlər. Xüsusilə gənc rəssamlar Hindistan, Yaponiya, İngiltərə, Yunanıstan, Polşa, Rumıniya, İran və s. ölkələrdə keçirilən beynəlxalq rəsm müsabiqələrində iştirak edərək mükafatlar, diplomlar, hədiyyələr qazanıblar.

Bu günlərdə mərkəz daha bir şad xəbər alıb. Yunanıstanın Xanti bələdiyyəsi tərəfindən keçirilən "4-cü Biennale" dünya uşaq rəsm müsabiqəsinə göndərilmiş rəsm dərnəyinin üzvü Tural Həsənovun və Cahid Əziminin əl işləri I, Arzu Məmmədovanın, Nərmin İsmayılzadənin, Mərcan Məmmədovanın əl işləri II, Nicat Məmmədovun rəsmləri isə III yerə layiq görülüb.

Bu böyük uğura görə Yunanıstandan qaliblərə diplomlar, medallar, müsabiqənin kataloqu və "5-ci Biennale" dünya uşaq rəsm müsabiqəsində iştirak etmək üçün xüsusi dəvətnamələr göndərilib. Sevindirici haldır ki, müsabiqəyə təqdim olunan dünya uşaqlarının rəsm əsərləri arasından seçilərək məhz mərkəzin yeniyetmə rəssamı Arzu Məmmədovanın əsəri kataloqun üz qabığına vurulmuşdur.

Nizami Rayon Uşaq-Gənclər Yaradıcılıq Mərkəzinin direktoru Lalə Qəti bildirdi ki, Rusiyada, Türkiyədə, Çexiyada və Polşada keçiriləcək beynəlxalq rəsm müsabiqələrinə də yeniyetmə və gənc rəssamlar öz əl işlərini təqdim ediblər. İnanırıq ki, bu müsabiqələrdə də yetirmələrimiz uğur qazanaraq bizi sevindirəcəklər.

Sifai SƏFƏROVA

Azərbaycan müəllimi.- 2010.- 5 mart.- S.6.