Məktəbli rəssamın fərdi sərgisi

Martın 6-da Ucar şəhər Mədəniyyət Evində Azərbaycan Respublikasının Qızıl Aypara Cəmiyyətinin yaranmasının 90 illiyi və "Ekologiya ili" ilə əlaqədar Ucar şəhər 2 nömrəli orta məktəbin 6-cı sinif şagirdi Əhmədov İslam Aslan oğlunun fərdi rəsm sərgisi keçirilib.

Tədbirdə çıxış edən rayon icra hakimiyyəti başçısının müavini Nazir Mirzəliyev rayonda aparılan abadlıq işlərindən və Prezident İlham Əliyevin 2010-cu ili "Ekologiya ili" elan etməsindən danışaraq balaca rəssamın bu mövzuya da toxunduğunu qeyd edib.

Rayon təhsil şöbəsinin müdiri Fuad İsrafilov istedadlı şagirdlərin üzə çıxarılmasında belə tədbirlərin böyük əhəmiyyəti olduğunu bildirib.

Azərbaycan Respublikası Qızıl Aypara Cəmiyyətinin Mingəçevir regional mərkəzinin koordinatoru Aydın Nəsibovun sərgi haqqında söylədiyi fikirləri balaca rəssamın sənət uğurundan xəbər verir. Azərbaycan Respublikası Qızıl Aypara Cəmiyyətinin Ucar rayon bölməsinin sədri Əlimirzə Mustafayev isə balaca İslamı müxtəlif hədiyyələrlə sevindirib. Çıxış edənlər balaca rəssamı təbrik edib və ona gələcək işlərində uğurlar diləyiblər.

Nizami MİRZƏ

Azərbaycan müəllimi.- 2010.- 19 mart.- S.23.