Norveçli diplomatlar Azərbaycan Dillər Universitetində olublar

Mayın 7-də Norveçin Xarici İşlər Nazirliyinin MDB ölkələri üzrə şöbəsinin direktor müavini Bard Svendsen, Norveçin Azərbaycandakı səfiri Yon Ramberq Azərbaycan Dillər Universitetində olublar. Görüşdə Norveç universitetləri ilə Azərbaycan universitetləri, xüsusilə ADU arasında təhsil sahəsində pilot layihələrin həyata keçirilməsi müzakirə edilib. ADU-nun rektoru, professor Səməd Seyidov Norveç və bu ölkənin Azərbaycandakı səfirliyi ilə əlaqələrin genişlənməsindən məmnunluğunu söyləyib. O, ADU-nun müəllim və tələbələrinin Norveçin Oslo Universitetində beynəlxalq yay məktəbində iştirakının əməkdaşlığın inkişafında önəmli rol oynadığını bildirib.

Öz növbəsində Bard Svendsen ADU ilə gələcəkdə də pilot layihəsinin mümkünlüyü və bu baxımdan əməkdaşlığın önəmli olduğunu vurğulayıb. O, ADU ilə Norveç universitetlərinin əməkdaşlığının uğurla davam etdiyini nəzərə çatdırıb.

Tədbirdə layihə rəhbəri Vibeke Roqen bildirib ki, ADU ilə Norveçin Azərbaycandakı səfirliyinin uğurlu əməkdaşlığı nəticəsində ADU-da fəaliyyət göstərən Skandinaviya Mərkəzinin kitabxana bazasının daha da zənginləşdirilməsi və inkişaf etdirilməsi planlaşdırılır. Sonra Norveçin ölkəmizdəki səfiri Y.Ramberq ADU-nun tələbələrinin səfirlikdə təcrübə keçməsinin əhəmiyyətini vurğulayıb. O qeyd edib ki, təcrübə müddətində tələbələr səfirliyin bütün yığıncaq və görüşlərində iştirak etmişlər və bu təcrübə təhsillə yanaşı, peşəkarlığa da səbəb olmuşdur. Görüşdə gələcəkdə keçiriləcək pilot layihənin detalları və xüsusiyyətləri müzakirə olunub.

Şakir CƏFƏROV

Azərbaycan müəllimi.- 2010.- 14 may.- S.2.