"Heydər Əliyev və Azərbaycanın inkişafı" mövzusunda elmi-praktik konfrans

Mayın 7-də Bakı Pedaqoji Kadrların İxtisasartırma və Yenidənhazırlanma İnstitutunda ümummilli lider Heydər Əliyevin anadan olmasının 87-ci ildönümünə həsr edilmiş "Heydər Əliyev və Azərbaycanın inkişafı" mövzusunda elmi-praktik konfrans keçirildi.

Giriş sözü ilə konfransı açan rektor, professor Asəf Zamanov görkəmli dövlət xadimi, tariximizə qurucu xilaskar kimi daxil olmuş ümummilli lider Heydər Əliyevi xalqımızın taleyində, iqtisadi-siyasi, mənəvi həyatında misilsiz xidmətlər göstərən dahi şəxsiyyət kimi səciyyələndirdi. Qeyd etdi ki, Heydər Əliyev şəxsiyyətinin müdrikliyi, böyüklüyü ondadır ki, onun düşüncələri, əməli fəaliyyəti təkcə bu günlə məhdudlaşmamış, həm də uzaq gələcəyə ünvanlanmışdır. Azərbaycan tarixinin 1969-cu ilin 14 iyulundan sonrakı dövrünün əhatəli təhlili və qiymətləndirilməsi belə bir həqiqəti aşkar edir ki, Heydər Əliyevin respublikaya rəhbər seçilməsindən sonra ölkəmizin ictimai-siyasi həyatında, o cümlədən maarif və təhsil sahəsində açıq müşahidə edilən tənəzzül prosesinə son qoyuldu. 70-80 -ci illərdə Azərbaycan intibahını şərtləndirən, onu səciyyələndirən mühüm amillər sırasında təhsilin,elmin, mədəniyyətin yüksəlişi xüsusilə diqqəti cəlb edir.Həmin dövrdə məktəblərin texniki və elmi-metodiki vasitələrlə təminatı əsaslı şəkildə yaxşılaşdı. 1978-ci ildə fizika və kimya kabinetləri ilə təminat 92,2 faizə, məktəblərin kitabxana ilə təminatı isə 97,9 faizə yüksəlmişdi. Ali təhsilin kəmiyyət və keyfiyyətcə yüksəlişinin əsasını da ümummilli lider qoymuşdur. Heydər Əliyevin uzaqgörənliklə əsasını qoyduğu təhsil ənənələri sırasında azərbaycanlı gənclərin respublikamız üçün gərəkli ixtisaslara yiyələnmələrindən ötrü keçmiş sovetlər ölkəsinin qabaqcıl ali məktəblərinə göndərilməsi təcrübəsi xüsusi yer tutur. Hər il qabiliyyətli gənclərin böyük bir hissəsinin SSRİ-nin elm və tədris ənənələri ilə tanınmış qabaqcıl ali məktəblərinə göndərilməsi Heydər Əliyevin uzaqgörən siyasətinə ən bariz nümunədir. Bundan əlavə, gənclərin böyük bir dəstəsi ölkənin ali hərbi məktəblərinə, Kiyev Mülki Aviasiya İnstitutuna, Patris Lumumba adına Xalqlar Dostluğu Universitetinə, Ümumittifaq Dövlət Kinematoqrafiya İnstitutuna qəbul olunurdular. Bu yolla ulu öndər Azərbaycanın o dövr üçün ən vacib olan elm və kadr potensialının möhkəmlənməsinə nail olmuşdur. Artıq 1981-ci ildə Moskva, Leninqrad (indiki Sankt-Peterburq), Kiyev və digər şəhərlərin qabaqcıl ali məktəblərində 244 ixtisas üzrə 3600-dən çox azərbaycanlı oğlan və qız təhsil alırdı. Bu gün Azərbaycan təhsilində qlobal dəyişikliklər, yeniləşmə prosesi gedir. Müstəqil Azərbaycanın gələcəyi, milli müstəqilliyimizin taleyi çağdaş təhsilimizin uğurlarından asılıdır. Heydər Əliyevin zəngin yaradıcılıq irsi, şəxsi nümunəsi və dövlətçilik fəaliyyəti gənc nəslin milli və ümumbəşəri dəyərlər zəminində tərbiyə olunması, təhsil alması işinin səmərəli təşkili üçün ən qiymətli mənbədir. Heydər Əliyevin bu günə və gələcəyə ünvanlanan ideyaları onun siyasi varisi Prezident İlham Əliyev tərəfindən uğurla həyata keçirilir.

Millət vəkili, AMEA-nın müxbir üzvü, professor Nizami Cəfərov geniş və əhatəli çıxışında türk dünyasının lideri Heydər Əliyevi "Dahiliyin zirvəsi" adlandırdı. Akademik Asəf Nadirov "Heydər Əliyev və Azərbaycanda sosial-iqtisadi yüksəliş" mövzusunda danışdı. BPKİYİ-in Psixologiya kafedrasının müdiri, psixologiya elmləri namizədi Hökümə Əliyevanın hazırladığı təsviri kompozisiyada ulu öndər Heydər Əliyev bir çox tarixi şəxsiyyətlərlə müqayisə olundu, kafedra müdiri, dosent Aydın Paşayev "Pedaqoji kadrların ixtisasartırmasının formalaşmasında Heydər Əliyevin rolu" mövzusunda məruzə etdi. Binəqədi Rayon İcra Hakimiyyəti başçısının müavini Vüsal İsmayılov, Bakı Şəhəri üzrə Təhsil İdarəsinin müdir müavini Hüseyn Əsgərov dahi şəxsiyyət Heydər Əliyevin təhsilin inkişafındakı böyük xidmətlərindən söz açdılar.

Sonda rektor Asəf Zamanov "Peşəkarlığın inkişaf vektoru" mövzusunda ustad dərslərinin bir qrup müdaviminə sertifikatlar təqdim etdi.

Sifai SƏFƏROVA

Azərbaycan müəllimi.-2010.- 14 may.-S.6.