"Açıq dərs" yüksək qiymətləndirildi

Bakı şəhərindəki Ələkbər Əliyev adına 204 nömrəli məktəb 1981-ci ildə fəaliyyətə başlayıb. 1176 şagird yerlik məktəbdə hazırda 64 sinifdə 1271 şagird təhsil alır. Onların təlim-tərbiyəsi ilə 165 müəllim məşğul olur. Məktəbdə dərslər müasir metodlarla keçilir.

204 nömrəli orta məktəb 2008-2009-cu tədris ilini yüksək göstəricilərlə başa vurub. 103 məzundan 56-sı ali məktəblərə daxil olub. Məktəbin 13 məzunu 500-dən, 4 məzunu isə 600-dən çox bal toplayıb. 204 nömrəli məktəb beynəlxalq İnternet layihəsində iştirak edərək 300 məktəb arasında birinci yerə layiq görülüb.

Qazanılan uğurlar, ilk növbədə, məktəbin pedaqoji kollektivinin zəhmətinin nəticəsidir. Burada peşəkar müəllimlərin sayı onlarcadır. Onlar arasında əməkdar müəllim fəxri adına layiq görülən Dilruba Hüseynovanın, "Ən yaxşı müəllim" müsabiqəsinin qalibi Almaz Həsrətin, 8-9-cu siniflər üçün "Riyaziyyat, test tapşırıqları" kitabının müəlliflərindən biri Bəylər Şahməmmədovun və başqalarının adını çəkmək mümkündür. 204 nömrəli məktəbin uğurlarında bu təhsil ocağının direktoru Ziba Rzayevanın əməyini də xüsusi qeyd etmək lazımdır.

Məktəbdə tez-tez "açıq dərs"lər təşkil olunur, müəllimlər öz təcrübələrini həmkarları ilə bölüşürlər. Cari dərs ilində məktəbdə keçirilən və bir növ müsabiqə xarakteri daşıyan "açıq dərs"lərdə ibtidai sinif müəllimi Bilqeyis İsmayılova fərqlənib. Onun müasir tədris metodları ilə apardığı "açıq dərs"lər çox maraqla qarşılanır. O, "açıq dərs"lərində kiçikyaşlı uşaqların informasiya-kommunikasiya texnologiyaları ilə işinə xüsusi diqqət yetirir. Dərsdə videomateriallardan geniş istifadə olunur. B.İsmayılovanın bu yaxınlarda IV "B" sinfi ilə apardığı "açıq dərs" isə 2009-2010-cu tədris ilinin ən maraqlı və fərqlənən dərslərindən biri hesab olunub. Dərsi dinləyən mütəxəssislər, ibtidai sinif müəllimləri müəllimin yaradıcı işini, fəal təlim metodlarından məharətlə istifadə etməsini yüksək qiymətləndiriblər.

Arzu ƏLİYEVA

Azərbaycan müəllimi.- 2010.- 14 may.- S.6.