Şərəfli həyat yolu

Hər bir şəxs özünün keçdiyi həyat yoluna nəzər salanda, unudulmaz və xoş xatirələrə dönmüş anlarını, günlərini xəyalından keçirəndə istər-istəməz kimlərlə ünsiyyət saxladığı, kimlərlə yoldaşlıq və dostluq etdiyi insanlar göz önünə gəlir. Elə insanlar var ki, onların həyatı, fəaliyyəti elinə, xalqına, vətəninə xidmətə həsr olunur. Müdriklər demişkən, "xalq üçün, vətən üçün yaşanan ömür əsl insan ömrüdür". Belə insanların ömrü çətin, mənalı və şərəfli olur, başı həmişə el içində uca olur. Onlar öz xoşbəxtliyini, səadətini, varlığını vətənə, xalqa ləyaqətlə xidmətdə görür. Belə insanlar öz xalqının, millətinin mənəvi siması, genefondudur desək səhv etmərik. Tam məsuliyyət və qürurla deyə bilərik ki, belə insanlardan biri də istedadlı alim, ustad-pedaqoq, sözün həqiqi mənasında, gözəl insan, iqtisad elmləri namizədi, dosent Şakir Şahpur oğlu Bədəlovdur. Mən Şakir müəllimi tələbəlik illərindən tanıyıram.

Şakir Bədəlov 1940-cı il mayın 15-də Azərbaycanın İsmayıllı rayonunun Zarat kəndində kolxozçu ailəsində anadan olmuşdur. O, hələ körpə ikən ata qayğısından məhrum olmuş, atası Böyük Vətən müharibəsində iştirak etmiş, 1945-ci ilin mart ayında ağır yaralanaraq həlak olmuşdur. Kolxozçu işləyən anası üç bacı və bir oğuldan ibarət ailəni çox çətinliklə saxlamışdır. 1957-58-ci dərs ilində orta məktəbi müvəffəqiyyətlə bitirən Şakir Bədəlov 1959-cu ilin axırına qədər kolxozda işləyir, ailəyə köməklik göstərir. 1960-cı ilin yanvarında Bakıya gələrək Qaradağ Mexanikləşdirilmiş Daş Karxanasında fəhlə kimi işə düzəlir. İşləyə-işləyə ali məktəbə qəbul imtahanlarına hazırlaşır və sənədlərini Azərbaycan Dövlət Universitetinin (indiki Bakı Dövlət Universiteti) iqtisad fakültəsinə təqdim edir və qəbul imtahanlarını yüksək qiymətlərlə verərək maliyyə və kredit ixtisasına qəbul olunur.

Universitetdə əla qiymətlərlə oxuyan Şakir Bədəlov elmi tədqiqata həvəs göstərir və II kursdan başlayaraq tələbə elmi cəmiyyətinə üzv olur. Hələ 1963-cü ildə III kursda oxuyarkən "Yeni cəmiyyət quruculuğunun iqtisadi qanunauyğunluqları" mövzusunda TEC-də etdiyi elmi məruzə görkəmli alim, iqtisad fakültəsinin dekanı, Siyasi iqtisad kafedrasının müdiri, professor Həsən Dadaşovun və professor Bəhmən Axundovun diqqətini cəlb edir və onların tövsiyəsi ilə həmin məruzə universitetin Tələbə Elmi Əsərləri məcmuəsində nəşr olunur (Bakı, ADU mətbəəsi 1963. səh. 3-18).

Şakir Bədəlov 1965-ci ildə Azərbaycan Dövlət Universitetini maliyyə və kredit ixtisası üzrə fərqlənmə diplomu ilə bitirmişdir. Universitetin Elmi Şurası onu aspiranturaya qəbul olunmağa tövsiyə edir.

Şakir Bədəlov professor Həsən Dadaşovun rəhbərliyi altında "Marksın kredit haqqında təlimi" mövzusunda diplom işi yazmışdır. Diplom işinə verdiyi rəyin sonunda professor H.Dadaşov qeyd edir ki, "əgər dövlət imtahan komissiyası diplom işini müdafiə etdikdən və dövlət imtahanlarını verdikdən sonra Ş.Bədəlovun gələcək ixtisaslaşma üçün yararlı və qabiliyyətli olduğunu müəyyən edərsə, onda arzu edərdim ki, komissiya onun aspiranturaya qəbul olunması üçün tövsiyə edilməsi məsələsini müzakirə etsin". Belə də olur. Fakültənin təqdimatına əsasən universitetin Elmi Şurası Şakir Bədəlovun aspiranturaya qəbul olunmasını tövsiyə edir.

Şakir Bədəlov təyinatla 1965-ci ilin avqustundan 1966-cı ilin sentyabrına qədər Abşeron rayon maliyyə şöbəsində baş büdcə inspektoru vəzifəsində çalışır. 1966-cı ilin sentyabr ayında D.Bünyadzadə adına Azərbaycan Xalq Təsərrüfatı İnstitutunun Maliyyə və kredit kafedrasına müəllim vəzifəsinə dəvət edilmişdir. Bununla da o, öz taleyini İqtisad Universiteti ilə bağlamışdır.

Şakir Bədəlov 1968-ci ilin noyabrında zabit kimi həqiqi hərbi xidmətə çağrılır və 1969-cu ilin noyabrına qədər hərbi hissədə maliyyə təminatı xidmətinin rəisi vəzifəsində çalışır. Ordudan tərxis edildikdən sonra yenidən Azərbaycan Xalq Təsərrüfatı İnstitutunda elmi-pedaqoji fəaliyyətini davam etdirir, 1970-ci ildə Maliyyə və kredit kafedrasının baş müəllimi seçilir.

Səmərəli elmi-pedaqoji fəaliyyətinə və institutun ictimai işlərində fəal iştirakına görə 1974-cü ildə "Sosializm yarışının qalibi" döş nişanı ilə təltif edilmişdir.

1975-ci ilin dekabrında Moskva Maliyyə İnstitutunda (indiki Maliyyə Akademiyası) maliyyə, pul tədavülü və kredit ixtisası üzrə namizədlik dissertasiyası işini müvəffəqiyyətlə müdafiə edərək iqtisad elmləri namizədi alimlik dərəcəsi almışdır.

1982-ci ildə Az.XTİ-nin Maliyyə və kredit kafedrasının dosenti vəzifəsinə seçilmişdir. Şakir Bədəlov uzun illər fakültənin və institutun ictimai işlərində fəal iştirak etmişdir. 1970-1976-cı illərdə fakültə həmkarlar təşkilatının sədri, 1976-1982-ci illərdə fakültə xalq nəzarəti qrupunun sədri və institut xalq nəzarətinin üzvü, 1982-1984-cü illərdə institut kuratorlar şurasının sədri vəzifələrində çalışmışdır. Uzun illər fakültə və institutun (universitetin) elmi və elmi-metodiki Şuralarının üzvü olmuşdur. 1994-2001-ci illərdə "İqtisad elmləri: nəzəriyyə və praktika" jurnalının redaksiya heyətinin üzvü olub.

Şakir Bədəlovun bir neçə elmi məqaləsi keçmiş İttifaqın mərkəzi jurnallarında dərc olunmuşdur.

1984-cü ilin oktyabrında maliyyə-statistika fakültəsinin dekan müavini təyin edilmiş, 1987-ci ilin aprel ayında müsabiqə yolu ilə həmin fakültənin dekanı vəzifəsinə seçilmişdir. 1988-ci ildə AzXTİ-nin ləğv edilməsi və N.A.Voznesenski adına Leninqrad Maliyyə İqtisad İnstitutu Bakı filialının yaradılmasından sonra köçürmə yolu ilə həmin vəzifədə çalışmış, 1989-cu ilin yanvarında yenidən dekan vəzifəsinə seçilmişdir.

1990-cı ilin sentyabrında Azərbaycan Dövlət İqtisad Universitetinin yaradılması ilə maliyyə və kredit fakültəsinin dekanı seçilmiş və 1996-cı ilə qədər bu vəzifədə çalışmışdır.

Şakir Bədəlov 1990-cı ildə Azərbaycan SSR Xalq Təhsili Nazirliyinin müvafiq əmri ilə yüksək ixtisaslı iqtisadçı kadrların hazırlanmasında, elmi-tədqiqat işlərinin təşkilində və institutun maddi-texniki bazasının möhkəmləndirilməsində göstərdiyi xidmətlərinə görə nazirliyin Fəxri fərmanı, 1991-ci ildə SSRİ Dövlət Sığortasının 70 illiyi münasibəti ilə Azərbaycan Respublikası Dövlət Sığorta Şirkətinin Fəxri fərmanı ilə təltif edilmişdir.

Şakir Bədəlovun təşkilatçılıq qabiliyyəti və işgüzarlığı nəzərə alınaraq 2001-ci ildə yenidən Azərbaycan Dövlət İqtisad Universiteti maliyyə və kredit fakültəsinin dekanı seçilmiş və 2005-ci ilə qədər bu vəzifədə çalışmışdır. İşlədiyi dövrdə səmərəli elmi-pedaqoji fəaliyyətinə və təşkilatçılıq qabiliyyətinə görə universitet rəhbərliyinin bir sıra təşəkkür və mükafatlarına layiq görülüb.

Şakir Bədəlov "Maliyyə və kredit", "Müəssisələrin və xalq təsərrüfatı sahələrinin maliyyəsi", "Maliyyə", "Büdcə sistemi" dərsliklərinin həmmüəllifi, bir sıra dərs vəsaitlərinin və çoxsaylı proqram və metodiki vəsaitlərin, 50-dən artıq elmi məqalənin müəllifidir. Bir sıra beynəlxalq elmi konfranslarda elmi məruzələrlə çıxışlar etmişdir.

Şakir müəllim maliyyə, büdcə sistemi, büdcə proqnozlaşdırılmasının problemləri və s. fənləri tədris etməklə, mühazirə və seminar məşğələlərini yüksək elmi-nəzəri səviyyədə qurur və təcrübə ilə sıx əlaqələndirir. Tədris işini günün tələbləri səviyyəsində qurmaq üçün daim öz üzərində çalışır, tədrisin interaktiv formalarını geniş tətbiq edir, üzərinə düşən vəzifələrin vaxtında və yüksək keyfiyyətlə yerinə yetirilməsinə daim səy göstərir. Hazırda elmi-tədqiqat işlərini davam etdirməklə yanaşı, yeni dərslik və dərs vəsaitlərinin hazırlanması üzərində işləyir.

Şakir müəllim TEC xətti ilə də tələbələrin elmi-tədqiqat işlərinə daim rəhbərlik edir, onun rəhbərliyi ilə çoxsaylı tələbələr tələbə elmi konfranslarında etdiyi elmi məruzələrinə görə diplom və mükafatlara layiq görülmüşlər.

O, həm özünə, həm də tələbələrinə və yoldaşlarına qarşı tələbkarlığı, eyni zamanda qayğıkeşliyi, səmimiliyi və təvazökarlığı sayəsində universitetin tələbə kollektivinin və professor-müəllim heyətinin dərin hörmətini qazanmışdır.

Şakir Bədəlov yaxşı ailə başçısıdır, üç övladı var, onların hamısı ali təhsilli və ailəlidir, bir oğlu iqtisad elmləri namizədidir.

Şakir müəllim həm də sədaqətli, etibarlı və təmənnasız dostdur.

Keçdiyi çox çətin, lakin olduqca məzmunlu və şərəfli həyat yolunun 70 illiyini, səmərəli əmək və elmi-pedaqoji fəaliyyətinin 50 illiyini səmimi-qəlbdən təbrik edir, ona möhkəm cansağlığı, uzun ömür, ailə səadəti və elmi-pedaqoji fəaliyyətində daha böyük uğurlar arzulayırıq.

Bəybala XANKİŞİYEV

Azərbaycan müəllimi.- 2010.- 14 may.- S.7.