Zəngilan məktəbində Milli Qəhrəmanla görüş

Bu günlərdə Bakının Binəqədi rayonunda fəaliyyət göstərən Zəngilan rayon 4 nömrəli orta məktəbində polis polkovnik-leytenantı, Azərbaycan Respublikasının Milli Qəhrəmanı Sahil Ələmdar oğlu Məmmədovla görüş keçirildi. Əvvəlcə şəhidlərimizin xatirəsi bir dəqiqəlik sükutla yad edildi.

Tədbiri giriş sözü ilə təhsil ocağının direktoru Cəbrayıl Şıxəliyev açaraq bildirdi ki, Azərbaycan Respublikasının Milli Qəhrəmanlarından yalnız 17-si bu gün bizlərlədir. Ürəkağrısı, eyni zamanda qürur hissi ilə qeyd etməliyəm ki, Azərbaycan Milli Ordusunun ilk şəhid əsgəri Firdovsi Məmmədov və Daxili Qoşunların ilk şəhidi Hətəmxan Babayev zəngilanlıdırlar. Torpaqlarımızın bütövlüyü uğrunda mübarizəyə qoşulan bu insanların hər biri bizim üçün əzizdir, müqəddəsdir. Bu gün işığına toplaşdığımız Sahil Məmmədov da belələrindəndir.

Çıxış edənlər Milli Qəhrəmanın torpaqlarımızın müdafiəsi yolunda göstərdiyi şücaətdən danışdılar.

Şagirdlər vətənə həsr olunmuş şeirlərlə, mahnılarla tədbiri daha da yaddaqalan və maraqlı etdilər.

Tədbirin sonunda Milli Qəhrəman Sahil Məmmədov qısa, lakin maraqlı və təsirli çıxışı ilə şagirdlərə harada olmalarından asılı olmayaraq vətəni həmişə sevməyi tövsiyə etdi.

Tədbir iştirakçıları Milli Qəhrəmanla xatirə şəkli çəkdirdilər.

Rəşad ZİYADOV

Azərbaycan müəllimi.- 2010.- 21 may.- S.8.