Xarici tələbələrin məzun günü qeyd olundu

Naxçıvan Dövlət Universitetində xarici tələbələrin məzun günü qeyd olundu.

Tədbirdə giriş sözü ilə çıxış edən universitetin rektoru, akademik İsa Həbibbəyli universitet həyatında artıq ənənə halını alan belə tədbirlərin əhəmiyyətini vurğuladı, Türkiyə - Azərbaycan dostluq və əməkdaşlıq əlaqələrindən danışdı. Qeyd olundu ki, universitetimiz uzun illərdir Türkiyə Cümhuriyyətinin bir sıra ali məktəbləri ilə müxtəlif sahələrdə sıx əməkdaşlıq edir, qardaş ölkə universitetlərinin elm, təhsil, İKT sahəsindəki təcrübələrini öyrənir. Vurğulandı ki, universitetdə dünyanın 10 müxtəlif ölkəsindən təhsil alan 245 xarici tələbədən 207-si bakalavr, 20-si isə magistr olmaqla türkiyəli tələbələrdir ki, onların da 92 nəfəri bu il məzun olaraq işgüzar həyata atılacaqlar. Rektor bütün məzunlara uğurlar dilədi.

Tədbirdə iştirak edən Türkiyə Cümhuriyyətinin muxtar respublikadakı baş konsulu Ayhan Enginar da çıxış edərək məzunlara burada qazandıqları bilikləri, dəyərləri gələcək həyatlarında tətbiq etməyi, qoruyub saxlamağı tövsiyə etdi.

Tarix-filologiya fakültəsinin dekanı, filologiya elmləri namizədi, dosent, Naxçıvan MR-in əməkdar müəllimi İman Cəfərov, incəsənət fakültəsinin musiqişünaslıq ixtisası üzrə II kurs tələbəsi Rumiyə Qasımova, xarici tələbələr adından tarix ixtisası üzrə hazırlıq kursunun dinləyicisi, koreyalı Myongga Yaung, beynəlxalq münasibətlər ixtisası üzrə I kurs tələbəsi Khairuz Zaman məzun-tələbələrə səmimi təbriklərini çatdırdılar. Məzunlar adından çıxış edən fizika - riyaziyyat fakültəsinin fizika ixtisasının məzunu Şahinduran Çingiz universitetdə təhsil aldıqları müddətdə əhatə olunduqları hərtərəfli diqqət və qayğıya, onlar üçün yaradılan şəraitə görə minnətdarlıqlarını ifadə etdi. Sonra bir qrup məzuna universitet rəhbərliyi adından xatirə hədiyyələri təqdim olundu.

Tədbir tələbə rəqs qrupunun ifasında yallı və digər rəqs nömrələri ilə yekunlaşdı.

Nərmin CƏFƏROVA

Azərbaycan müəllimi.- 2010.- 21 may.- S.4.