Azərbaycan-Latviya Təhsil Forumu keçirildi

2010-cu ilin 24-26 may tarixlərində Bakı şəhərində Azərbaycan-Latviya Təhsil Forumu keçirildi.

Mayın 24-də forum iştirakçıları öncə Fəxri xiyabana gələrək ümummilli lider Heydər Əliyevin xatirəsini ehtiramla yad edib, məzarı önünə gül dəstəsi qoydular. Görkəmli oftalmoloq-alim, akademik Zərifə xanım Əliyevanın da məzarı ziyarət olundu. Tədbir iştirakçıları daha sonra Şəhidlər xiyabanına gedərək Azərbaycanın azadlığı və suverenliyi uğrunda mübarizədə canlarından keçmiş Vətən övladlarının məzarları üzərinə qərənfillər düzdülər.

Sonra Bakı Dövlət Universitetində Azərbaycan-Latviya Təhsil Forumunun açılış mərasimi oldu. Forumdan əvvəl Latviya Respublikasının təhsil və elm naziri xanım Tatyana Koke və rəhbərlik etdiyi nümayəndə heyəti universitetdəki Heydər Əliyev muzeyi ilə tanış oldular. Muzeydə ulu öndərin zəngin həyat və fəaliyyətindən, BDU-da təhsil aldığı illərdən bəhs edən sənədlərlə, fotoşəkillərlə tanışlıq qonaqlarda xoş təəssüratlar yaratdı. Azərbaycan və Latviya ali təhsil müəssisələrinin informasiya stendləri ilə tanışlıqdan sonra forum öz işinə başladı.

Təhsil naziri Misir Mərdanov forum iştirakçılarını salamlayaraq Latviya Respublikasının təhsil və elm naziri Tatyana Kokeni və onun rəhbərlik etdiyi nümayəndə heyətini Azərbaycanda görməyindən məmnunluq hissi keçirdiyini söylədi. Nümayəndə heyətinin tərkibində Latviya Respublikası Təhsil və Elm Nazirliyinin məsul şəxslərinin, bu ölkənin bir neçə universitet və qeyri-universitet tipli özəl ali təhsil müəssisəsi rektorları və digər əməkdaşların olduğunu deyən təhsil naziri onları forum iştirakçılarına təqdim etdi.

Azərbaycanla Latviya arasında mövcud dostluq əlaqələrindən söz açan təhsil naziri ölkələrimiz arasında belə bir yüksək səviyyədə keçirilən Təhsil Forumunun hər iki tərəf üçün mühüm əhəmiyyət kəsb etdiyini söylədi. Nazir forumun keçirilməsində əsas məqsədin Latviyanın ali təhsil sistemi ilə tanış olmaq, bu ölkənin təhsil qurumları ilə Azərbaycanın təhsil qurumları arasında əlaqələr qurmaq, ali məktəblər arasında müqavilələr, sazişlər imzalamaq, elm sahəsində əməkdaşlıq, həmçinin müəllim- tələbə mübadilələri həyata keçirmək və digər məsələlərin müzakirə edilməsi olduğunu qeyd etdi. Forumun, eyni zamanda hər iki ölkənin ali təhsil müəssisələrinin nümayəndələri arasında əməkdaşlıq üzrə təcrübə və perspektivlərin müzakirə edilməsi baxımından da səmərəli olacağını bildirdi.

Təhsil naziri Misir Mərdanov sonra "Azərbaycanda təhsil" mövzusunda geniş məruzə-təqdimatla çıxış etdi.

Nazir öncə ölkəmiz haqqında qonaqlara məlumat verərək, 2009-cu ilin yekunlarına görə Azərbaycanın dünya miqyasında ən sürətlə inkişaf edən ölkələr sırasında olduğunu bildirdi. Ölkəmizin bütün sahələrdə uğurlu inkişafından danışan təhsil naziri xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsinə də toxundu. Qeyd olundu ki, konflikt nəticəsində Azərbaycanın tərkib hissəsi olan Dağlıq Qarabağ və onun ətrafındakı 7 rayon işğal olunmuş, 1 milyondan çox azərbaycanlı qaçqın və məcburi köçkün düşmüş, 20 mindən çox insan həlak, 50 min nəfər əlil olmuşdur. Bu hadisələrdə Azərbaycanın təhsil sisteminə də böyük ziyan dəymiş, işğal olunmuş ərazilərdə 1 ali məktəb, 3 ali məktəb filialı, 6 orta ixtisas, 693 orta və texniki peşə məktəbi, 855 uşaq bağçası dağıdılmışdır. Həmin faktları qonaqların nəzərinə çatdıran nazir qeyd etdi ki, ölkə başçısı cənab İlham Əliyevin bu problemin həlli istiqamətində apardığı işlər dünya ölkələrinin də diqqətindədir. Təhsil naziri tezliklə torpaqlarımızın geri qaytarılacağına ümidvar olduğunu bildirdi.

Azərbaycanın təhsil sistemi haqqında geniş məlumat verən nazir Misir Mərdanov ölkəmizdə təhsilin ən prioritet sahələrdən biri olduğunu söylədi. Təhsilin bütün pillələri əhatə olunmaqla hazırlanmış xüsusi cədvəllər, təhsil sistemi haqqında məlumatlar ekranda forum iştirakçılarına nümayiş etdirildi. Təhsillə bağlı 16 Dövlət Proqramının həyata keçirildiyini qeyd edən nazir bunların hər biri barədə ayrı-ayrılıqda danışdı. Məruzə-təqdimatda son illərdə təhsilin inkişafı sahəsində əldə edilən nailiyyətlərdən geniş bəhs olundu. Azərbaycanda ali təhsilin inkişafı, yeniləşməsi ilə bağlı görülən işlər barədə də ətraflı danışıldı. Ölkəmizin təhsil sistemi barədə müfəssəl məlumat verən nazir Misir Mərdanov çıxışının sonunda forumun Azərbaycanla Latviyanın təhsil sahəsində əlaqələrinin genişləndirilməsində, inkişaf etdirilməsində mühüm rol oynayacağını bildirdi.

Çıxış üçün söz alan Latviya Respublikasının təhsil və elm naziri Tatyana Koke nümayəndə heyətinin adından səmimi qarşılandıqlarına görə Azərbaycan Respublikasının təhsil naziri Misir Mərdanova təşəkkür etdi. Azərbaycanla təhsil sahəsində əməkdaşlıqda maraqlı olduqlarını söyləyən Tatyana Koke bu forumda böyük həvəslə iştirak etdiklərini bildirdi.Nazir ölkələrimizin ali təhsil sistemində oxşar cəhətlərin olduğunu dedi. Sonra latviyalı nazir forum iştirakçılarını öz ölkəsinin təhsil sistemi ilə ətraflı tanış etdi. Xanım Tatyana Koke Latviyanın çoxillik təhsil ənənələrinə malik universitetləri barədə məlumat verdi, ölkəsində elmi-tədqiqat işlərinə böyük maraq göstərilməsindən danışdı. Latviya Respublikasının ali məktəblərində 13 azərbaycanlı gəncin təhsil aldığını deyən nazir onların sayının artmasını arzuladı. Tatyana Koke forumun hər iki ölkənin təhsil və elm sahələrində mühüm işlərin həyata keçirilməsində, xüsusilə ali təhsil müəssisələri arasında birbaşa əlaqələrin yaranmasında, alimlərin bir-biri ilə işgüzar münasibətlərinin qurulmasında, birgə elmi-tədqiqatların aparılmasında, müəllim-tələbə mübadiləsində mühüm rol oynayacağına ümidvar olduğunu bildirdi.

Forumda çıxış edən Bakı Dövlət Universitetinin rektoru, akademik, millət vəkili Abel Məhərrəmov Azərbaycanın ən qocaman ali təhsil ocaqlarından biri olan BDU-nun 90 illik tarixi dövründə əldə olunan nailiyyətlərdən danışdı.

Riqa Texniki Universitetinin rektoru, akademik İvars Knets və Xəzər Universitetinin rektoru, professor Hamlet İsaxanlı tərəfindən də təqdimatlar edildi.

Sonra Bakı Dövlət Universiteti ilə Riqa Texniki Universiteti arasında protokol imzalandı.

Forumda daha sonra Azərbaycan və Latviya təhsil işçilərinin təqdimatları oldu. Təqdimatda öz əksini tapmış məsələlər ətrafında fikir mübadiləsi aparıldı.

***

Mayın 25-də forum iştirakçılarının ölkəmizin bir sıra ali təhsil müəssisələrində professor-müəllim heyətləri ilə görüşləri keçirildi. Azərbaycan-Latviya Təhsil Forumu mayın 26-da başa çatdı.

Samirə KƏRİMOVA

Azərbaycan müəllimi.- 2010.- 28 may.- S.2.