Təhsil Şurası musiqi təhsilinə dair konfrans keçirdi

Mayın 25-də Bakıdakı 20 nömrəli orta məktəbdə ümummilli lider Heydər Əliyevin anadan olmasının 87-ci ildönümü münasibətilə Azərbaycan Təhsil Şurası və Bakı Şəhəri üzrə Təhsil İdarəsinin "Məktəbli gənclərin şəxsiyyət kimi formalaşmasında musiqi təhsilinin rolu" mövzusunda birgə konfransı keçirildi.

Təhsil Şurası İdarə Heyətinin üzvlərinin, musiqi təhsili ilə bağlı alim-mütəxəssislərin, paytaxt məktəblərinin musiqi müəllimlərinin iştirak etdiyi konfransı Təhsil Şurasının sədri, professor Əjdər Ağayev açaraq rəhbərlik etdiyi qurumun vaxtaşırı olaraq təhsilin müxtəlif problemlərinə həsr edilmiş elmi-nəzəri və təcrübi konfranslar keçirdiyini, müzakirə olunan problemlərlə bağlı irəli sürülən təkliflərin ümumiləşdirilərək təhsili idarəetmə orqanlarına çatdırıldığını bildirdi və həmin silsilədən keçirilən növbəti konfransın mövzusunun aktuallığını qeyd etdi.

Bakı Şəhəri üzrə Təhsil İdarəsi müdirinin müavini Məhəbbət Qarabağlı konfransda çıxış edərək təhsil idarəsinin fəaliyyətindən, paytaxt məktəblərində təhsilin keyfiyyətini yüksəltmək istiqamətində həyata keçirilən tədbirlərdən, şagirdlərin şəxsiyyət kimi yetişməsi üçün görülən işlərdən bəhs etdi.

Konfransda Azərbaycan Təhsil Şurasının sədri, professor Əjdər Ağayev "Ümumtəhsil məktəblərində musiqi fənninin tədrisi vəziyyəti və onun təkmilləşdirilməsi yolları" mövzusunda məruzə etdi.

Sonra konfransda məruzə ətrafında çıxışlar oldu. Söz alan pedaqoji elmlər doktoru, professor Vidadi Xəlilov, bəstəkar, professor Oqtay Rəcəbov, Azərbaycan Milli Konservatoriyası tərkibində Musiqi Kollecinin direktoru, professor Nazim Kazımov, Bakıdakı 177 nömrəli məktəbin direktoru Həqiqə Məmmədova, ayrı-ayrı təhsil ocaqlarının musiqi müəllimləri musiqi tədrisi sahəsindəki mövcud vəziyyətdən, problemlər və onların aradan qaldırılması yollarından danışdılar, təkliflər irəli sürdülər.

Konfransın sonunda bəstəkar Oqtay Rəcəbovun "Tıq-tıq xanım" operasının incəsənət gimnaziyası şagirdlərinin ifasında təqdimatı oldu.

Y.ƏLİYEV

Azərbaycan müəllimi.- 2010.- 28 may.- S.6.