Daha bir məktəbdə VMA yaradıldı

Mayın 21-də Bakıdakı 42 nömrəli orta məuktəbdə Valideyn-Müəllim Assosiasiyasının təsis konfransı keçirildi.

Tədbirdə çıxış edən məktəbin direktoru Firəngiz Həmidova qeyd etdi ki, bu təşkilatın yaradılmasında əsas məqsəd valideyn və müəllimlərin sıx əməkdaşlığı vasitəsilə şagirdlərin təlim-tərbiyəsinin faydalılığını artırmaq, valideynlə məktəb arasında səmərəli ünsiyyət yaratmaqdır. Qeyd olundu ki, məktəbdə yaradılan assosiasiya yüksək səviyyədə qurulacaq, faydalı işlər görüləcək.

Azərbaycan Milli Valideyn-Müəllim Assosiasiyasının icraçı direktoru Təranə Şərifova çıxışında bildirdi ki, bu gün məktəbdə elə məsələlər var ki, onu nə valideyn məktəbsiz, nə də məktəb valideynsiz həll edə bilmir. Valideynlərin məktəblə əlaqəsinin zəif olması təlim-tərbiyəyə mənfi təsir göstərir. Qeyd edildi ki, bir çox regionlarda YUNİSEF və Təhsil Nazirliyi ilə birlikdə sorğu aparılıb. Təranə xanım daha sonra müəllim nüfuzundan da söhbət açdı.

Sonra açıq səsvermə yolu ilə VMA-nın prezidenti məktəbin valideyni, AMEA-nın İqtisadiyyat İnstitutunun baş elmi işçisi Mübariz Bağırov seçildi. İdarə heyəti və VMA-nın əsasnaməsi təsdiq edildi.

Konfransda Bakı Şəhəri üzrə Təhsil İdarəsinin əməkdaşları Sitarə Məmmədova, Şəhla Kərimova, Yaqut Məmmədova, MVMA-nın eksperti Şahin Rəcəbov, Bakı şəhərindəki 9, 15, 111, 151, 152 və 292 nömrəli məktəblərin direktorları, valideynlər çıxış edərək VMA-ya uğurlar dilədilər.

Ədalət DAŞDƏMİRLİ

Azərbaycan müəllimi.- 2010.- 28 may.- S.18.