Bərdə və Füzuli rayonlarında treninqlər keçirilib

Azərbaycan Respublikası Təhsil Nazirliyi, Ekologiya və Təbii Sərvətlər Nazirliyi və Almaniyanın GTZ Təşkilatının dəstəyi və iştirakı ilə Davamlı İnkişaf Cəmiyyəti müəllim və şagirdlər arasında vaxtaşırı olaraq bilgilənmə işləri aparır. Cəmiyyətin xətti ilə 22 may Ümumdünya Biomüxtəliflik günü və cari ilin ölkəmizdə "Ekologiya ili" elan olunması ilə əlaqədar mayın 17 və 19-da Bərdə və Füzuli rayonlarında "Biomüxtəlifliyin Davamlı İdarə Olunması Cənubi Qafqazda Texniki Əməkdaşlıq Proqramı" layihəsi çərçivəsində müəllim və şagirdlər üçün treninqlər keçirilib. Sözügedən layihədə məqsəd Cənubi Qafqaz ölkələrində biomüxtəlifliyin davamlı idarə olunması üçün mühitin yaradılmasına kömək etməkdir. Layihə habelə orta məktəb müəllim və şagirdlərinin ekoloji biliklərinin artırılmasını, əhalinin ekoloji maarifləndirilməsini və ekoloji mədəniyyətin formalaşdırılmasını nəzərdə tutur.

Mayın 17-də Bərdə rayonundakı Zərifə Əliyeva adına texniki fənlər təmayüllü məktəb-liseydə, mayın 19-da isə Füzuli rayonunun Əhmədbəyli kəndində yerləşən RTŞ-ın akt zalında keçirilmiş treninqləri milli məsləhətçi, Bakıdakı 204 nömrəli məktəbin müəllimi Almaz Həsrət və Ekologiya və Təbii Sərvətlər Nazirliyi Ornitologiya şöbəsinin mütəxəssisi Əbülfət Səmədov aparıblar. Uğurla keçən seminarda Bərdə və Füzuli rayonlarının təhsil işçilərinə 22 may Biomüxtəliflik günü ilə əlaqədar təlim vəsaitləri paylanıb.

S.SƏFƏROVA

Azərbaycan müəllimi.- 2010.- 28 may.- S.6.