"Vətən mənim, Vətən sənin, bizlər isə bu Vətənin"

Bakıdakı 164 nömrəli orta məktəbdə "Vətən mənim, Vətən sənin, bizlər isə bu Vətənin" adlı ədəbi-bədii musiqili tədbir keçirildi. Giriş sözü ilə tədbiri açan ibtidai sinif müəllimi Sevinc Məcidova qonaqları salamladıqdan, Vətən anlayışı haqqında uşaqlara geniş məlumat verdikdən sonra sözü aparıcılara verdi. Tofiq Quliyevin "Vals" rəqsinin sədaları altında səhnəyə daxil olan aparıcılar məktəbin bir il ərzində qazandığı uğurları sözdə yox,əyani göstərmək istədiklərini bildirdilər.

Şagirdlərin nümayiş etdirdikləri rəngarəng səhnəciklər, vətənpərvərlik mövzusunda söylədikləri şeirlər, ifa etdikləri milli rəqslər, oxuduqları "Kəndimiz", "Qurban olum, Azərbaycan" mahnıları, "Qarabağ şikəstəsi"nin xoş sədaları, dahi Üzeyirin "Uvertüra"sının səslənməsi iştirakçılarda xoş ovqat yaratdı...

Sonda məktəbin direktoru Kəmalə Qədirova çıxışında məşhur bir kəlamı xatırlatdı: "O xalq xoşbəxtdir ki, onun yaxşı müəllimləri var". O, yaradıcı, qabaqcıl müəllimlər Sevinc Məcidova və Təranə Bağırovanın hazırladıqları tədbiri yüksək qiymətləndirdi.Bakı Şəhəri üzrə Təhsil İdarəsi Metodmərkəzinin direktor müavini Sitarə Məmmədova isə belə tədbirlərin şagirdlərin təlim-tərbiyəsinə müsbət təsir göstərdiyini vurğuladı.

Sifai SƏFƏROVA

Azərbaycan müəllimi.- 2010.- 28 may.- S.23.