Böyük türkmən şairi Məxdumqulu Fəraqi yad edilib

Mayın 21-də Bakı Dövlət Universitetində görkəmli türkmən şairi Məxdumqulu Fəraqinin həyat və yaradıcılığına həsr olunmuş konfrans keçirilib. Konfransı giriş sözü ilə rektor, akademik Abel Məhərrəmov açaraq M.Fəraqinin həyat və yaradıcılığından bəhs edib. Məxdumqulunun şeirlərinin dərinliyindən, zənginliyindən, türkmən xalqının böyük şairə olan sevgi və ehtiramından bəhs edən rektor əlavə edib ki, böyük şair həm də xalq dilini poeziyaya gətirdiyinə görə millətinin yaddaşına əbədi həkk olunub.

Akademik Abel Məhərrəmov filologiya elmləri doktoru Ramiz Əsgərin Məxdumqulunun və davamçısı Molla Nəfəsin kitablarını Azərbaycan dilinə tərcümə etməsindən danışıb, bu işləri səmərəli sayıb və ona təşəkkür edərək işlərin davamlı olmasını arzu edib. Eyni zamanda Azərbaycan-Türkmənistan münasibətlərindən, Türkmənistan Prezidenti Qurbanqulu Berdimuhəmmədovun BDU-nun fəxri doktoru olmasından, ortaq türk dilinin yaradılması ideyasından da bəhs edib. O, Türk dünyasını bir-birindən ayıran halların olmadığını, əksinə birləşdirən cəhətlərin çoxluğunu diqqətə çatdırıb.

Tədbirin keçirilməsi üçün yaradılmış şəraitə görə rektor, akademik Abel Məhərrəmova təşəkkür edən Türkmənistanın ölkəmizdəki səfiri Annamamed Mamedov ölkələrarası əlaqələrdən, bu münasibətlərin dostluq və qardaşlıq səviyyəsində olmasından danışıb.

“Böyük türkmən şairi Məxdumqulu Fəraqi” məruzəsi ilə çıxış edən filologiya fakültəsinin Azərbaycan mühacirət ədəbiyyatı və bədii tərcümə elmi-tədqiqat laboratoriyasının müdiri, filologiya elmləri doktoru Ramiz Əsgər bildirib ki, Məxdumqulu Fəraqinin 400-ə yaxın şeirinin toplandığı ilk kitab çapdan çıxıb və hazırda 800-ə yaxın şeirin cəmləşdiyi növbəti kitabın hazırlıq işləri gedir. Natiq böyük şairin 800 şeirində 101 min sözdən istifadə etdiyini bildirib. Qeyd edildi ki, şairin "ayrılıq", "həsrət" mənasını verən "Fəraqi" təxəllüsünu seçməsi ailəsi və şəxsi həyatındakı faciələrlə bağlı olub.

Türk xalqları ədəbiyyatı kafedrasının müəllimi, filologiya elmləri namizədi Firuzə Ağayeva Azərbaycan və Türkmənistanın tarixi təşəkkülünə, taleyinə, soy və kökünə, coğrafiyasına, adət-ənənələrinə görə bir-birinə çox oxşadığını deyib və Məxdumqulunun şeirlərindən nümunələr gətirməklə çıxışını yekunlaşdırıb.

Türkmənistan Elmlər Akademiyasının Məxdumqulu adına Dil və Ədəbiyyat İnstitutunun şöbə müdiri Çarı Quliyev və Bayrammurad Taqanov, Əlyazmalar İnstitutunun əməkdaşı Atamurad Səfərmuradov da görkəmli şairlə bağlı maraqlı faktlara toxunub, Azərbaycanı vəsf edən “Yaylaqları var” şeiri ilə tədbirə əlavə rəng qatıblar.

Azərbaycan müəllimi.- 2010.- 28 may.- S.17.