Koreyalı gənclər heyranlıqlarını gizlətmədilər

Mayın 14-də Azərbaycan Dillər Universitetində koreyalı gənclərin ölkəmizə səfəri çərçivəsində tələbələrlə görüş keçirildi. Görüşdə Azərbaycan Respublikası Gənclər və İdman Nazirliyinin nümayəndələri, ADU-nun Koreya dili kafedrasının koreyalı müəllimləri də iştirak edirdilər.

Koreyalı qonaqların ADU-da görüşünün əsas məqsədi azərbaycanlı tələbələrlə və Azərbaycanın təhsil mühiti ilə yaxından tanış olmaq idi. Görüş zamanı koreyalı gənclər ADU tələbələri ilə fikir mübadiləsi apararaq Koreya və Azərbaycan təhsil sistemləri haqda müzakirələr apardılar. Sonra koreyalı qonaqlar azərbaycanlı dostlarına hədiyyələr təqdim etdilər.

Tədbirin sonunda koreyalı gənclər ADU İnformasiya və Resurs Kompleksi ilə yaxından tanış oldular, eləcə də ADU Folklor mərkəzinin Azərbaycan mədəniyyətini əks etdirən əl işləri və milli geyimlərinə öz heyranlıqlarını bildirdilər.

Şakir CƏFƏROV

Azərbaycan müəllimi.- 2010.- 28 may.- S.16.