Azərbaycanın Milli Qəhrəmanları

Quliyev Mətləb Kamran oğlu

1959-cu il yanvarın 9-da Beyləqan rayonunda anadan olmuşdu. Orta təhsilini Sumqayıt şəhərində almış, sonra C.Naxçıvanski adına hərbi məktəbə daxil olmuşdu. Məktəbi bitirdikdən sonra müxtəlif müəssisələrdə fəaliyyət göstərmişdi. Hərbi xidməti Ukraynada yerinə yetirmişdi. Mətləb 1985-ci ildə Azərbaycan Dövlət Pedaqoji İnstitutunu bitirmişdi. 1992-ci ildə daxili işlər orqanlarında çalışmağa başlamışdı. O, bir zabit kimi Vətəni qorumaq üçün Qarabağa - cəbhə bölgəsinə yollanmışdı.1992-ci il avqustun 31-də Ağdam bölgəsində ağır döyüşlərdə fəal iştirak etmiş, düşməni böyük itkilərə uğradaraq, geri çəkilməyə məcbur etmişdi. Erməni işğalçılarına qarşı davam edən qızğın döyüşdə onun gülləsinin qurtardığını hiss edən düşmən irəliyə doğru hücuma keçmişdi.

M.Quliyev elə həmin döyüşdə qəhrəmancasına həlak olub.

Ailəli idi. Bir övladı var.

Azərbaycan Respublikası Prezidentinin 6 noyabr 1992-ci il tarixli 290 nömrəli Fərmanı ilə baş leytenant Quliyev Mətləb Kamran oğlu ölümündən sonra Azərbaycanın Milli Qəhrəmanı adına layiq görülüb.

Bakıda Şəhidlər xiyabanında dəfn olunub. Sumqayıt şəhərindəki 3 nömrəli orta məktəb onun adını daşıyır. Məktəbin önündə büstü qoyulub. Yaşadığı binanın önünə xatirə lövhəsi vurulub, adına bulaq tikilib.

Quliyev Mirzə Məcid oğlu

1974-cü il yanvarın 11-də Bərdə rayonunun Saatlı kəndində anadan olmuşdur. 1991-ci ildə kəndlərindəki orta məktəbi bitirmiş, Mingəçevir şəhərindəki 39 nömrəli texniki peşə məktəbində qaynaqçı peşəsinə yiyələnmişdir. O, 1992-ci ildə hərbi xidmətə çağırılmışdır. Naxçıvan MR-in Sədərək rayonu ərazisində PDM-də tuşlayıcı-atıcı kimi döyüşə başlamış, Batabat ərazisində gedən döyüşlərdə vuruşmuşdur. Mirzə 1993-cü il iyulun 28-də Ağdam bölgəsinə göndərilmiş, erməni işğalçılarına qarşı döyüşlərdə iştirak etmişdir. Sonra Füzuli, Ağdərə, Tərtər bölgələrində gedən döyüşlərdə PDM-lə düşmənin bir neçə tankını və canlı qüvvəsini məhv etmişdir. M.Quliyev vətənpərvərlik borcunu layiqincə yerinə yetirdiyinə görə "Hərbi xidmətə görə" medalı ilə təltif olunmuşdur. O, 1995-ci ildə Polis Akademiyasının qiyabı şöbəsinə daxil olmuşdur. 1997-ci ildə isə Bakı şəhər Baş Polis İdarəsinin Çevik Polis Alayında polis nəfəri kimi fəaliyyətini davam etdirmişdir. 2003-cü ildə ona leytenant rütbəsi verilmişdir. Paytaxtın Nəsimi rayon 20-ci polis bölməsində müvəkkil vəzifəsinə təyin edilmişdir.

Azərbaycan Respublikası Prezidentinin 4 aprel 1995-ci il tarixli 307 nömrəli Fərmanı ilə Quliyev Mirzə Məcid oğlu Azərbaycanın Milli Qəhrəmanı adına layiq görülmüşdür.

Ailəlidir.

Quliyev Nazim Qabil oğlu

1965-ci il fevralın 7-də Beyləqan rayonunun Örənqala kəndində anadan olmuşdu. 1982-ci ildə kəndlərindəki orta məktəbi bitirdikdən sonra hərbi xidmətə çağırılmışdı. Əsgəri xidmətini başa çatdırdıqdan sonra bir müddət əmək fəaliyyəti ilə məşğul olmuşdu. 1988-ci ildə Qarabağ münaqişəsi başlayanda Nazim də silaha sarılaraq özünümüdafiə dəstələrinin birinə qoşularaq döyüş bölgəsinə yollanmışdı. 1991-ci ilin aprelində Füzuli bölgəsində erməni işğalçılarına qarşı gedən döyüşlərdə fəal iştirak etmişdi. O, eyni zamanda Cuvarlı, Tuğ, Məlikcan, Arış, Divanallar və digər kəndlər uğrundakı döyüşlərdə də rəşadətlə vuruşmuşdu. 1992-ci ildə Köşbək kəndi ətrafında gedən ağır döyüşdə xüsusi qəhrəmanlıq göstərərək, yaralı döyüşçü yoldaşlarını təhlükəli zonadan çıxartmaqda əsl vətənpərvərlik nümayiş etdirmişdi.

N.Quliyev belə ağır döyüşlərin birində qəhrəmancasına həlak olub.

Subay idi.

Azərbaycan Respublikası Prezidentinin 8 oktyabr 1992-ci il tarixli 264 nömrəli Fərmanı ilə Quliyev Nazim Qabil oğlu ölümündən sonra Azərbaycanın Milli Qəhrəmanı adına layiq görülüb.

Füzuli rayonu ərazisində dəfn olunub. Təhsil aldığı Örənqala kənd orta məktəbi onun adını daşıyır.

Quliyev Nofəl Zahid oğlu

1963-cü il oktyabrın 4-də Əli Bayramlı (indiki Şirvan) şəhərində anadan olmuşdu. 1981-ci ildə həmin şəhərdə orta məktəbi bitirmiş, 1982-ci ildə hərbi xidmətə çağırılmışdı. Əsgəri xidmətini başa çatdırdıqdan sonra bir müddət Bakı Məişət Kondisionerləri Zavodunda çalışmışdı. Nofəl altı il Tümen vilayətində yaşadıqdan sonra Vətənə qayıtmış, DİN-də polis nəfəri kimi işə qəbul olunmuşdu. 1991-ci ilin dekabrında yoldaşları ilə birlikdə döyüş bölgəsinə yollanaraq, Goranboyun Todan kəndi uğrunda gedən döyüşdə fəal iştirak etmişdi. Həmin vaxt düşmən böyük qüvvə ilə kəndə hücum etmişdi. Düşmən qüvvələrinin çox olmasına baxmayaraq, cəsur döyüşçülərimiz kəndin bir qarış torpağının əldən getməsinə imkan vermirdilər. Bu gərgin döyüşdə düşmən xeyli canlı qüvvə itirsə də, hücumu dayandırmırdı. Erməni işğalçılarının əhatəsində olan Nofəl son nəfəsinə qədər vuruşaraq, yağı düşmənə əsir düşməmək üçün axırıncı gülləsini ürəyinə sıxmışdı.

N.Quliyev 1991-ci il dekabrın 12-də qəhrəmancasına həlak olub.

Ailəli idi. Bir övladı var.

Azərbaycan Respublikası Prezidentinin 6 iyun 1992-ci il tarixli 831 nömrəli Fərmanı ilə Quliyev Nofəl Zahid oğlu ölümündən sonra Azərbaycanın Milli Qəhrəmanı adına layiq görülüb.

Şirvan şəhərindəki Şəhidlər xiyabanında dəfn olunub. Şirvan şəhər 9 nömrəli orta məktəb onun adını daşıyır.

Qurbanov Novruz Əliyullah oğlu

1975-ci il iyunun 2-də Ağstafa rayonunun Yuxarı Göycəli kəndində anadan olmuşdu. 1992-ci ildə kəndlərindəki orta məktəbi bitirmişdi. O, 1993-cü ildə Ağstafa rayon Hərbi Komissarlığı tərəfindən əsgəri xidmətə çağırılmışdı. Bir müddət hərbi təlim keçdikdən sonra Azərbaycanın ayrılmaz bir hissəsi olan Qarabağ torpaqlarının erməni işğalçılarından müdafiəsinə qalxan ordunun sıralarında vətənpərvər əsgər kimi xidmət etmişdi. Novruz komandirlərinin bütün döyüş tapşırıqlarını nümunəvi yerinə yetirdiyinə, döyüşçü yoldaşları ilə mehriban davranışına görə hamının dərin hörmət və məhəbbətini qazanmışdı.

1995-ci il martın 13-də Azərbaycanda dövlət çevrilişinə cəhdin qarşısının alınmasında fəal iştirak etmişdi.

N.Qurbanov 1995-ci il martın 17-də məlum hadisələr zamanı həlak olub.

Subay idi.

Azərbaycan Respublikası Prezidentinin 4 aprel 1995-ci il tarixli 307 nömrəli Fərmanı ilə Qurbanov Novruz Əliyullah oğlu ölümündən sonra Azərbaycanın Milli Qəhrəmanı adına layiq görülüb.

Anadan olduğu Yuxarı Göycəli kəndində dəfn olunub. Elə həmin kənddə də onun büstü qoyulub.

Milli Qəhrəmanlar Beynəlxalq İnformasiya Mərkəzinin materialları əsasında

hazırladı: Ədalət DAŞDƏMİRLİ

Azərbaycan müəllimi.- 2010.- 5 noyabr.- S.1.