Təlim-tərbiyə sahəsində ciddi dönüş yaradılıb

Bakıdakı 61 nömrəli orta məktəbdə keçən dərs ilindən fərqli olaraq 2010-2011-ci dərs ilində təlim-tərbiyənin vəziyyətinin yaxşılaşdırılması istiqamətində xeyli iş görülüb. Bununla əlaqədar məktəbə yeni təyin olunmuş direktor Zenfira Şıxəliyeva ilə əlaqə saxladıq. O bildirdi ki, işə başladığı ilk gündən məktəbin həyətyanı sahəsi hasara alınıb, binanın fasad hissəsi yenidən ağardılıb, sıradan çıxmış qapı və pəncərələr təmir olunub. Eyni zamanda məktəbdaxili sanitar qovşaqları bərpa edilib, sinifdənxaric və məktəbdənkənar görülən işlər tam nəzarətə götürülüb. Direktor onu da əlavə etdi ki, bu gün dərslik təminatı sahəsində heç bir problemimiz yoxdur və pedaqoji kollektivin hər bir üzvünün İKT sahəsindəki fəaliyyəti getdikcə genişlənir, müəllimlər dərslərini kompüter otaqlarında keçirlər.

Hər həftənin VI günü bu məktəbdə "Açıq qapı" günü keçirilir. Həmin gün valideynlər öz uşaqlarının təlim-tərbiyəsi ilə yaxından maraqlanır, istədikləri müəllimlərin dərslərində olur və məktəbin ümumi işinin planlaşdırılmasında fəal iştirak edirlər.

Şakir CƏFƏROV

Azərbaycan müəllimi.- 2010.- 5 noyabr.- S.3.