Aktyorlar məktəblilərin qonağı oldular

Bakıdakı M.Müşfiq adına 18 nömrəli orta məktəbdə Azərbaycan Dövlət Akademik Milli Teatrının bir qrup aktyoru ilə görüş keçirilib. Görkəmli sənət ustalarını, pedaqoji kollektivi və şagirdləri salamlayan məktəbin direktor müavini Bəsti Ağayeva sözü xalq artistləri Laləzar Mustafayevaya, Rafiq Əzimova, məktəbin məzunu - əməkdar artist Elxan Quliyevə verdi. Aktyorlar öz yaradıcılıq planları, yeni mövsümdə hazırlayacaqları tamaşalar barədə məlumat verdilər. Laləzar Mustafayevanın ifasında xalq şairi B.Vahabzadənin "Ana" şeiri, Rafiq Əzimovun isə "Dədə Qorqud" filmindən söylədiyi monoloq görüş iştirakçılarında xoş ovqat yaratdı.

Qonaqlara öz minnətdarlığını bildirən məktəbin direktoru Vaqif Hüseynov gələcəkdə onlarla tez-tez iş birliyi quracaqlarını vurğuladı.

Sonda şagirdlərin sualları aktyorlar tərəfindən cavablandırıldı.

 

 

Sifai SƏFƏROVA

 

Azərbaycan müəllimi.- 2010.- 5 noyabr.- S.5.