Mustafa Kamal Atatürk anıldı

Naxçıvan Dövlət Universitetində türk milli qurtuluş mübarizəsinin hərbi və siyasi lideri, Türkiyə Respublikasının qurucusu və ilk prezidenti Mustafa Kamal Atatürkün vəfatının 72-ci ildönümü münasibəti ilə tədbir keçirildi. Türkiyə Cümhuriyyətinin Naxçıvandakı konsulluğunun nümayəndələrinin və digər rəsmilərin qatıldığı tədbirdə türk xalqlarının milli müstəqilliyi uğrunda qurban getmiş şəhidlərin xatirəsi anıldı, hər iki ölkənin dövlət himnləri səsləndirildi.

Türkiyənin Naxçıvandakı Baş konsulu Ayhan Enginar çıxış edərək Türkiyənin qüdrətli dövlət kimi siyasi-iqtisadi tərəqqisində, türkdilli xalqların birliyində Mustafa Kamal Atatürkün misilsiz xidmətlərindən danışdı. Konsul bir millət, iki dövlət olan Türkiyə və Azərbaycanın sarsılmaz birliyinin gələcək zəfərlərin rəhni olmasından söz açdı. Qeyd olundu ki, Naxçıvan Dövlət Universitetinin Türkiyənin bir çox tanınmış universitetləri ilə sıx tərəfdaşlığı türkdilli dövlətlərdə elmin, təhsilin birgə inkişafına ən gözəl örnək sayılmalıdır.

Universitetin rektoru, akademik İsa Həbibbəyli çıxışında vurğuladı ki, Mustafa Kamal paşanın XX əsrin əvvəllərində başladığı istiqlaliyyət, müstəqillik uğrunda mübarizə əsrin sonlarında bütün türk xalqlarının azadlıq mücadiləsini alovlandırmışdır. Böyük Atatürkün və ümummilli lider Heydər Əliyevin türkçülük, bəşəri humanizm və milli birlik ideyaları bu gün tarixi bəhrələrini verməkdədir. Türk xalqının dahi öndərinə ümumxalq sevgisi Azərbaycanda ucaldılan möhtəşəm abidədə də öz əksini tapmışdır. Natiq əmin olduğunu bildirdi ki, hər iki dövlət bundan sonra da çiyin-çiyinə, əzmlə irəliləyərək gələcək siyasi uğurlara birgə imza atacaqdır.

Naxçıvan Türk Kurulunun nümayəndəsi Murad Fındık Mustafa Kamal Atatürkün ictimai-siyasi fəaliyyəti haqqında ətraflı məruzə etdi.

Sonra universitetin müəllimi, Azərbaycan Respublikasının əməkdar mədəniyyət işçisi Gülxarə Əhmədovanın rəhbərliyi ilə Tələbə Teatr Studiyasının hazırladığı "Atatürk" ədəbi-bədii kompozisiya böyük maraqla izlənildi.

Mehriban SULTAN

Azərbaycan müəllimi.- 2010.- 12 noyabr.- S.3.