Kursun dinləyicilərinə vəsiqələr təqdim edilib

Azərbaycan Respublikasının Prezidenti yanında Dövlət İdarəçilik Akademiyasında qısamüddətli ixtisasartırma kursunun növbəti buraxılışı olub. Dövlətin sosial siyasət, mahiyyət, prioritetlər və həyata keçirilmə mexanizmləri istiqaməti üzrə keçirilən kursda dövlət hakimiyyətinin mərkəzi şəhər, rayon orqanlarının, müvafiq nazirlik, komitə və idarələrinin rəhbər işçiləri iştirak ediblər.

Kursun əsas məqsədi "2006-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı"nın şərh edilməsi, bu sahədə dövlət siyasətinin mahiyyətini və strategiyasının açıqlanması, Azərbaycanda demoqrafiq proseslərin müasir vəziyyəti, meyilləri və qanunauyğunluqları, əmək pensiyaları haqqında qanunvericilikdə dəyişikliklər, əlavələr və sair problemlərlə bağlı biliklərin sistemləşdirilməsi, dinləyicilərə yeni məlumatların verilməsidir.

Tematik plan üzrə kursda Heydər Əliyevin dövlət idarəçilik təcrübəsi, Azərbaycanda sosial siyasət və onun əsas istiqamətləri, pensiya islahatlarının mahiyyəti və problemləri, pensiya siyasəti və onun həyata keçirilməsi və digər məsələlər əhatə edilib.

Kursda Azərbaycan Respublikası Prezidenti Administrasiyasının şöbə müdirləri və tanınmış alim-mütəxəssislər dinləyicilər qarşısında sosial siyasətin müasir problemlərinə dair müxtəlif mövzularda mühazirələrlə çıxış ediblər. Təhsil müddəti ərzində dinləyicilər Əmək və Əhalinin Sosial Müdafiəsi Nazirliyinin Aparatında təcrübə keçib. Eyni zamanda respublikada sosial siyasətin formalaşması və bu sahədə dövlət siyasətinin aktual məsələləri ilə yaxından tanış olublar.

Sonda Azərbaycan Respublikasının Prezidenti yanında Dövlət İdarəçilik Akademiyasının I prorektoru, professor Əlikram Abdullayev kursu bitirən dinləyicilərə vəsiqələr təqdim edib.

Şakir CƏFƏROV

Azərbaycan müəllimi.- 2010.- 12 noyabr.- S.5.